കൊളംബോ: അണ്ടര്‍-19 ഏഷ്യാകപ്പ് ക്രിക്കറ്റില്‍ ഇന്ത്യക്ക് ഹാട്രിക് ജയം.
അഫ്ഗാനിസ്ഥാനെതിരായ മത്സരത്തില്‍ മൂന്നു വിക്കറ്റിന്റെ ത്രസിപ്പിക്കുന്ന ജയമാണ് ഇന്ത്യ സ്വന്തമാക്കിയത്.
ഒരു ഘട്ടത്തില്‍ ആറിന് 92 റണ്‍സെന്ന നിലയില്‍ തോല്‍വി മുന്നില്‍ കണ്ടെങ്കിലും വാലറ്റനിരയുടെ പ്രകടനം ഇന്ത്യയെ രക്ഷപ്പെടുത്തുകയായിരുന്നു.
ഈ ജയത്തോടെ അഫ്ഗാനെ മറികടന്ന് ഇന്ത്യ പോയിന്റ് പട്ടികയില്‍ മുന്നിലെത്തി. ആദ്യം ബാറ്റ് ചെയ്ത അഫ്ഗാനെ 40.1 ഓവറില്‍ 124 റണ്‍സിന് എറിഞ്ഞിട്ടു. അഫ്ഗാന്‍ നിരയില്‍ 39 റണ്‍സെടുത്ത അബ്ദുല്ല തനിവാളാണ് ടോപ്‌സ്‌കോറര്‍.
അഞ്ചു വിക്കറ്റെടുത്ത സുശാന്ത് മിശ്രയും നാലു വിക്കറ്റ് വീഴ്ത്തിയ അഥര്‍വ അന്‍കൊലേ
ക്കറുമാണ് അഫ്ഗാനെ തകര്‍ത്തത്.
മറുപടി ബാറ്റിങിനിറങ്ങിയ ഇന്ത്യക്ക് ഒന്നിന് 81 റണ്‍സെന്ന നിലയില്‍ നിന്നാണ് 12 റണ്‍സെടുക്കുന്നതിനിടെ അഞ്ചു വിക്കറ്റു നഷ്ടമായത്. എങ്കിലും ഒരു വിധത്തില്‍ ജയിച്ചുകയറുകയായിരുന്നു.