വണ്ടൂര്‍: നടുവത്ത് കാരാട് എന്‍ജിനീയര്‍ പടിയില്‍ കഴിഞ്ഞദിവസം തെരുവുനായ്ക്കള്‍ രണ്ട് ആടുകളെ കടിച്ചുകൊന്നു. ക്ഷീര കര്‍ഷകയായ ചുണ്ടംപറ്റ ദേവകിയുടെ രണ്ട് ആടുകളെയാണ് കൊന്നത്. കടിയേറ്റ മൂന്നാമതൊരു ആട് ഗുരുതരാവസ്ഥയിലാണ്.
വീടിനു തൊട്ടടുത്തുള്ള പറമ്പില്‍ കെട്ടിയിട്ടിരുന്ന നാല് ആടുകളെ രാവിലെ 11ഓടെയാണ് പത്തിലധികം വരുന്ന തെരുവുനായ കൂട്ടം ആക്രമിച്ചത്. ടാപ്പിങ്ങ് തൊഴിലാളികള്‍ ഓടിക്കാന്‍ ശ്രമിച്ചെങ്കിലും ആടുകളുടെ ജീവന്‍ രക്ഷിക്കാനായില്ല.
സമീപത്തുള്ള പശുവിനും കടിയേറ്റിട്ടുണ്ട്. രണ്ടാഴ്ചക്കിടെ മേഖലയില്‍ നിരവധി കോഴികളേയും നായകള്‍ കടിച്ചു കൊന്നിട്ടുണ്ടെന്ന് നാട്ടുകാര്‍ പറയുന്നു. മഴക്കാലമായതോടെ തെരുവുനായ്ക്കളുടെ ആക്രമണം വര്‍ധിച്ചിട്ടുണ്ട്.