കവാഡിയ(ഗുജറാത്ത്): സര്‍ദാര്‍ വല്ലഭ് ഭായ് പട്ടേലിന്റെ പ്രതിമ അനാച്ഛാദനം ചെയ്യാനെത്തുന്ന പ്രധാനമന്ത്രി നരേന്ദ്ര മോദിക്കെതിരേ ഗുജറാത്തില്‍ വന്‍ പ്രതിഷേധം. സര്‍ദാര്‍ സരോവര്‍ ഡാം ഉള്‍പ്പെടുന്ന 22 ഗ്രാമങ്ങളിലെ ജനങ്ങളാണ് പ്രധാനമന്ത്രിക്കെതിരേ തുറന്ന പ്രതിഷേധവുമായി രംഗത്തെത്തിയത്.
സ്റ്റാച്യു ഓഫ് യൂനിറ്റി (ഐക്യത്തിന്റെ പ്രതിമ) എന്ന പേരിലാണ് സര്‍ദാര്‍ പട്ടേലിന്റെ പ്രതിമയെ കേന്ദ്രം വിശേഷിപ്പിക്കുന്നത്. പ്രതിമ സ്ഥാപിക്കുന്നതിനായി പ്രകൃതിവിഭവങ്ങള്‍ നശിപ്പിച്ചുവെന്ന് ആരോപിക്കുന്ന ജനങ്ങള്‍ ഇന്ന് നടക്കുന്ന പ്രതിമ അനാച്ഛാദന പരിപാടി ബഹിഷ്‌കരിക്കുമെന്നും അറിയിച്ചു.സര്‍ദാര്‍ സരോവര്‍ ഡാമിലാണ് ലോകത്തിലെ ഏറ്റവും വലിയ പ്രതിമ സ്ഥാപിച്ചിട്ടുള്ളത്. വനം, നദികള്‍, വെള്ളച്ചാട്ടങ്ങള്‍, ഭൂമി, കൃഷി എന്നിവയെ ആശ്രയിച്ചാണ് ഞങ്ങള്‍ ഇവിടെ ജീവിച്ചുവന്നത്. ഇതെല്ലാം നശിപ്പിക്കുകയാണ് ഇപ്പോള്‍ ചെയ്തിരിക്കുന്നത്. ഒരാളെ കൊലപ്പെടുത്തിയിട്ടുവേണോ ആഘോഷങ്ങള്‍ സംഘടിപ്പിക്കാന്‍. ഇത് ഞങ്ങളെ വല്ലാതെ വേദനിപ്പിക്കുന്നു. അതുകൊണ്ടുതന്നെ താങ്കള്‍ ഞങ്ങളുടെ മുന്‍പില്‍ ക്ഷണിക്കപ്പെടാത്ത അതിഥിയാണ്. ഈ അതിഥിയെ സ്വീകരിക്കാന്‍ ഞങ്ങള്‍ക്ക് കഴിയില്ലെന്നും ഗ്രാമീണര്‍ മോദിക്കയച്ച കത്തില്‍ ചൂണ്ടിക്കാട്ടുന്നു. അടിസ്ഥാന സൗകര്യങ്ങളില്ലാതെ പല ഗ്രാമങ്ങളും കഷ്ടപ്പെടുമ്പോഴാണ് കോടികള്‍ ചെലവഴിച്ച് പട്ടേലിന്റെ പ്രതിമ സ്ഥാപിച്ചതെന്നും ജനങ്ങള്‍ ആരോപിക്കുന്നു.
ഈ പ്രവൃത്തികള്‍ കണ്ട് അദ്ദേഹം കരയുമായിരുന്നു. ഞങ്ങള്‍ ഉയര്‍ത്തുന്ന പ്രതിഷേധത്തെ പൊലിസിനെ ഉപയോഗിച്ച് അടിച്ചമര്‍ത്തുമ്പോഴും എന്തുകൊണ്ട് ഞങ്ങള്‍ ഉയര്‍ത്തുന്ന ആവശ്യത്തെ ശ്രദ്ധിക്കാന്‍ താങ്കള്‍ തയാറാകുന്നില്ലെന്നും ഗ്രാമീണര്‍ ചോദിക്കുന്നു. പട്ടേല്‍ പ്രതിമയെ ചൊല്ലി മധ്യപ്രദേശ് ഉള്‍പ്പടെയുള്ള സംസ്ഥാനങ്ങളിലും പ്രതിഷേധം വ്യാപകമാണ്.