കാസര്‍കോട്: ജില്ലാ സപ്ലൈ ഓഫിസര്‍ അവധിയില്‍ പോയതിനെ തുടര്‍ന്ന് താലൂക് സപ്ലൈ ഓഫിസര്‍ക്ക് ചാര്‍ജ്ജ് നല്‍കി. ഇതേ തുടര്‍ന്ന് താലൂക് സപ്ലൈ ഓഫിസില്‍ കാര്‍ഡുടമകള്‍ കയറി ഇറങ്ങി വലയുന്നു.
കാസര്‍കോട് ജില്ലാ സപ്ലൈ ഓഫിസര്‍ പാലക്കാട് ജില്ലക്കാരിയായ ഉദ്യോഗസ്ഥയാണ് ഈ മാസം 31 വരെ അവധിയില്‍ പ്രവേശിച്ചത്. ഇതേ തുടര്‍ന്ന് ഹൊസ്ദുര്‍ഗ് താലൂക് സപ്ലൈ ഓഫിസര്‍ക്കാണ് ഇവര്‍ തന്റെ ചാര്‍ജ്ജ് ഏല്‍പ്പിച്ചത്. എന്നാല്‍ ഹസ്ദുര്‍ഗ് സപ്ലൈ ഓഫിസില്‍ റേഷന്‍ കാര്‍ഡുകളില്‍ തെറ്റുകള്‍ തിരുത്തി കിട്ടാനും മറ്റു ആവശ്യങ്ങള്‍ക്കും വേണ്ടിയെത്തുന്ന കാര്‍ഡുടമകള്‍ ഒട്ടനവധി തവണ സപ്ലൈ ഓഫിസില്‍ കയറി ഇറങ്ങിയാലും ഓഫിസര്‍ ഇല്ലെന്ന കാരണത്താല്‍ തിരികെ പോകേണ്ടി വരുന്ന അവസ്ഥയാണുള്ളത്.
സപ്ലൈ ഓഫിസില്‍ ബന്ധപ്പെട്ടാല്‍ ഓഫിസര്‍ ഉണ്ടെന്ന് ആളുകളോട് പറയുന്നുണ്ടെങ്കിലും കാര്‍ഡുടമകള്‍ ഓഫിസിലെത്തുമ്പോഴാണ് ഓഫിസര്‍ മറ്റൊരു സ്ഥലത്താണ് ഉള്ളതെന്ന് അറിയുന്നത്.
ഇതേ തുടര്‍ന്ന് മലയോര മേഖലയില്‍ നിന്നുള്‍പ്പെടെ പ്രതി ദിനം നൂറു കണക്കിന് ആളുകള്‍ ഹൊസ്ദുര്‍ഗിലെ ഓഫിസില്‍ കുറെ സമയം കാത്തിരുന്നു തിരികെ പോകുന്ന അവസ്ഥയാണുള്ളത്.
റേഷന്‍ കാര്‍ഡുകളില്‍ തെറ്റുകള്‍ തിരുത്താനും മരിച്ചവരെ ഒഴിവാക്കാനും,കൂടുതല്‍ അംഗങ്ങളെ ചേര്‍ക്കാനും ഉള്‍പ്പെടെയുള്ള അപേക്ഷകള്‍ ഓണ്‍ലൈനായി അപേക്ഷിച്ചിട്ടും മാസങ്ങളോളമായി ഒട്ടനവധി ആളുകള്‍ കൂടിക്കാഴ്ചക്ക് വേണ്ടി കാത്തിരിക്കുന്നുണ്ടെങ്കിലും സപ്ലൈ ഓഫിസില്‍ നിന്നും ഇവര്‍ക്ക് ഇത് സംബന്ധമായി ഒരു വിവരവും നല്‍കുന്നില്ല. ഓണ്‍ലൈന്‍ വഴി അപേക്ഷയും ബന്ധപ്പെട്ട രേഖകളും സമര്‍പ്പിച്ചാല്‍ ഓഫിസ് ജീവനക്കാര്‍ക്ക് ജോലി കുറയുകയും പ്രസ്തുത കാര്‍ഡ് ഉടമകള്‍ കൂടിക്കാഴ്ചക്ക് പോകുമ്പോള്‍ അസ്സല്‍ രേഖകളും കോപ്പികളും ഹാജരാക്കുന്നതോടെ വളരെ എളുപ്പത്തില്‍ കാര്യങ്ങള്‍ ശരിയാകുമെങ്കിലും ഓഫിസ് മേധാവി ഇല്ലാതെ വരുന്നതോടെ ഓണ്‍ലൈന്‍ അപേക്ഷകര്‍ക്കും രക്ഷയില്ല.
എന്നാല്‍ നേരിട്ട് അപേക്ഷ സമര്‍പ്പിച്ച കാര്‍ഡുടമകളും ഒട്ടനവധി തവണ സപ്ലൈ ഓഫിസുകളില്‍ കയറി ഇറങ്ങി തളരുന്ന അവസ്ഥയാണുള്ളത്. അതെ സമയം ഇന്ന് വരെ അവധിയില്‍ പോയിരിക്കുന്ന ജില്ലാ സപ്ലൈ ഓഫിസര്‍ തിരികെ വന്നാല്‍ ഹൊസ്ദുര്‍ഗ് സപ്ലൈ ഓഫിസര്‍ക്ക് ചാര്‍ജില് നിന്ന് ഒഴിവാകാനും കാഞ്ഞങ്ങാട് കേന്ദ്രീകരിക്കാനും സാധിക്കും.
എന്നാല്‍ ജില്ലാ സപ്ലൈ ഓഫിസര്‍ ഇന്ന് തിരികെ ജോലിയില്‍ പ്രവേശിക്കുമെന്ന ഉറപ്പൊന്നും ജില്ലാ ഓഫിസിലെ ജീവനക്കാര്‍ക്ക് ഇല്ല. ഇതോടെ ഹൊസ്ദുര്‍ഗ് ഓഫിസില്‍ കാര്‍ഡുടമകള്‍ ഇനിയും വിയര്‍ക്കുമെന്നാണ് സൂചന.