#അബ്ദുസ്സലാം കൂടരഞ്ഞി
മക്ക: ഭക്തിയുടെ നിറവില്‍ മക്കയിലെ വിശുദ്ധ കഅ്ബ കഴുകി. സഊദി ഭരണാധികാരി സല്‍മാന്‍ രാജാവിനെ പ്രതിനിധീകരിച്ച് മക്ക ഗവര്‍ണര്‍ അമീര്‍ ഖാലിദ് അല്‍ഫൈസല്‍ രാജകുമാരന്റെ നേതൃത്വത്തില്‍ തിങ്കളാഴ്ച സുബ്ഹി നിസ്‌കാരത്തിനു ശേഷമാണ് ചടങ്ങ് ആരംഭിച്ചത്.
പനിനീരും ഏറ്റവും മുന്തിയ ഊദ് അത്തറും മറ്റു സുഗന്ധദ്ര്യവ്യങ്ങളും ചേര്‍ത്ത് പ്രത്യേകം തയാറാക്കിയ സംസം വെള്ളം ഉപയോഗിച്ചാണ് കഅ്ബാലയത്തിന്റെ അകത്തളം കഴുകിയത്. ഇതേ വെള്ളത്തില്‍ കുതിര്‍ത്ത തുണി ഉപയോഗിച്ച് ഉള്‍വശത്തെ ചുമരുകള്‍ തുടച്ചു. നേരത്തെ മുഹര്‍റം 15നാണ് കഴുകല്‍ ചടങ്ങ് നടന്നിരുന്നത്. ഇതില്‍നിന്ന് വ്യത്യസ്തമായി ഏതാനും വര്‍ഷങ്ങളായി തിരക്കൊഴിഞ്ഞ വേളയില്‍ സൗകര്യത്തിനനുസരിച്ച് ഇരുഹറം കാര്യാലയ വിഭാഗം മുഹര്‍റത്തിലെ ഒരു ദിവസം നിശ്ചയിക്കുകയാണ് ഇപ്പോള്‍ ചെയ്തുവരുന്നത്. മുഹര്‍റത്തിനു പുറമേ ശഅബാന്‍ ഒന്നിനും ചടങ്ങ് നടക്കാറുണ്ട്. ഏതാനും ദിവസങ്ങള്‍ക്ക് മുന്‍പ് വിശുദ്ധ കഅ്ബയുടെ കിസ്‌വ താഴ്ത്തി സാധാരണ നിലയിലാക്കിയിരുന്നു. ഇന്ത്യയില്‍നിന്ന് മുസ്‌ലിം ലീഗ് ദേശീയ നിര്‍വാഹക സമിതി അംഗം പാണക്കാട് സയ്യിദ് സാദിഖലി ശിഹാബ് തങ്ങള്‍, വ്യവസായ പ്രമുഖനും ലുലു ഗ്രൂപ്പ് ചെയര്‍മാനുമായ എം.എ യൂസുഫലി എന്നിവര്‍ കഅ്ബ കഴുകല്‍ ചടങ്ങില്‍ സംബന്ധിച്ചു.