പഴയങ്ങാടി: താവം റെയില്‍വേ മേല്‍പ്പാല നിര്‍മാണം മന്ദഗതിയില്‍. കെ.എസ്.ടി.പിക്കു നിര്‍വഹണ ചുമതലയുള്ള പദ്ധതിയാണ് നീളുന്നത്. 2013 ജൂണ്‍ ഒന്നിനാണു പിലാത്തറ-പാപ്പിനിശേരി കെ.എസ്.ടി.പി റോഡ് നിര്‍മാണം ആരംഭിച്ചത്. രണ്ട് വര്‍ഷം കൊണ്ട് പ്രവര്‍ത്തി പൂര്‍ത്തിയാക്കുമെന്നാണ് കരാര്‍ വ്യവസ്ഥ. എന്നാല്‍ വര്‍ഷം നാലായിട്ടും റോഡ് നിര്‍മാണവും താവം മേല്‍പാല നിര്‍മാണവും പൂര്‍ത്തിയായില്ല മഴ ശക്തമായതോടെ താവം മേഖലയില്‍ റോഡ് ചെളിക്കുളമായി മാറി. ഇതോടെ ഇതുവഴിയുളള ബസ് സര്‍വിസ് റെയില്‍വേ ഗേറ്റ് കടമ്പ കടക്കാന്‍ മണിക്കൂറുകളോളം കാത്തിരിക്കേണ്ട സ്ഥിതിയാണ്. ബസ് ഓണേഴ്‌സ് അസോസിയേഷന്‍ 15 മുതല്‍ പ്രദേശത്തെ ബസ് സര്‍വിസ് നിര്‍ത്തിവയ്ക്കുമെന്ന് അറിയിച്ചിട്ടുണ്ട്. പാപ്പനിശേരി മേല്‍പാലത്തിന്റെയും താവം മേല്‍പാലത്തിന്റെയും പ്രവൃത്തി ഒരുമിച്ചാണ് തുടങ്ങിയതെങ്കിലും പാപ്പിനിശേരി മേല്‍പാലത്തില്‍ പരീക്ഷണ അടിസ്ഥാനത്തില്‍ വാഹനങ്ങള്‍ കടന്നുപോകാന്‍ തുടങ്ങിയിട്ടുണ്ട്.