ഗാന്ധി നഗര്‍: സംസ്ഥാന ബി.ജെ.പിസര്‍ക്കാര്‍ ഗോത്രമേഖലയിലെ വിദ്യാര്‍ഥികള്‍ക്ക് വിതരണം ചെയ്ത സ്‌കൂള്‍ ബാഗില്‍ ഉത്തര്‍ പ്രദേശ് മുന്‍ മുഖ്യമന്ത്രിയും സമാജ് വാദി പാര്‍ട്ടി നേതാവുമായ അഖിലേഷ് യാദവിന്റെ ചിത്രം. സ്‌കൂള്‍ കുട്ടികള്‍ക്കുള്ള പ്രവേശനോത്സവമായ ശാല പ്രവേശ് ഉത്സവത്തിന്റെ ഭാഗമായിട്ടാണ് 12,000 ബാഗുകള്‍ ആദിവാസി മേഖലകളില്‍ എത്തിച്ചത്. ചോട്ട ഉദേപൂര്‍ ജില്ലാ പഞ്ചായത്ത് അധികൃതരുടെ നേതൃത്വത്തില്‍ സന്‍ഖേദ ആദിവാസി ഗ്രാമത്തിലുള്ള കുട്ടികള്‍ക്ക് നല്‍കാനായി കൊണ്ടുവന്നതായിരുന്നു ബാഗുകള്‍. സൂറത്ത് കേന്ദ്രീകരിച്ചുള്ള ഒരു ബാഗ് നിര്‍മാണ ശാലയെയായിരുന്നു കുട്ടികള്‍ക്കുള്ള ബാഗ് നിര്‍മിക്കാന്‍ ചുമതലപ്പെടുത്തിയിരുന്നത്. ഗുജറാത്ത് വിദ്യാഭ്യാസ വകുപ്പിന്റെ സ്റ്റിക്കര്‍ ബാഗുകളില്‍ പതിക്കാന്‍ ആവശ്യപ്പെട്ടിരുന്നതായി പഞ്ചായത്ത് അധികൃതര്‍ അറിയിച്ചു. എന്നാല്‍ അഖിലേഷിന്റെ ചിത്രവും ഉത്തര്‍പ്രദേശ് വിദ്യാഭ്യാസ വകുപ്പിന്റെ മുദ്രാവാക്യവും ഉള്‍പ്പെടുത്തിയുള്ള ചിത്രങ്ങളാണ് ബാഗില്‍ പതിച്ചുവന്നത്. ഇതേ രീതിയിലുള്ള ബാഗുകള്‍ നേരത്തെ ഉത്തര്‍പ്രദേശ് സര്‍ക്കാര്‍ വിതരണം ചെയ്തിരുന്നു. ഈ സ്ഥാപനമായിരിക്കാം ബാഗുകള്‍ നല്‍കിയിട്ടുണ്ടാവുകയെന്നും ഗുജറാത്ത് സര്‍ക്കാര്‍ ആവശ്യപ്പെട്ടപ്പോള്‍ നേരത്തെയുണ്ടാക്കിവച്ചിരുന്ന ബാഗുകള്‍ ഇവിടേക്ക് തെറ്റായി അയച്ചതായിരിക്കാമെന്നുമാണ് ഗുജറാത്ത് വിദ്യാഭ്യാസ വകുപ്പ് പറയുന്നത്. സംഭവത്തെക്കുറിച്ച് അന്വേഷണത്തിന് ഉത്തരവിട്ടതായി വിദ്യാഭ്യാസ വകുപ്പ് അറിയിച്ചു.