മാറഞ്ചേരി: പാലപ്പെട്ടി ബീച്ച് റോഡ് സ്വദേശി ആലുങ്കല്‍ സമീറിന്റെ ഉടമസ്ഥതയിലുള്ള പലചരക്കു കട ദുരൂഹ സാഹചര്യത്തില്‍ കത്തി നശിച്ചു. ചൊവ്വാഴ്ച രാവിലെ ആറോടെയാണ് സംഭവം. കടക്കു സമീപമുള്ള വീട്ടിലെ യുവാവ് ഷട്ടറിനുള്ളില്‍ നിന്നും പുകഉയരുന്നത് കണ്ട് നോക്കിയപ്പോഴാണ് കടക്കു തീപിടിച്ച വിവരം അറിയുന്നത്.
തുടര്‍ന്ന് കടമുടമയും നാട്ടുകാരും ചേര്‍ന്ന് തീയണയ്ക്കാന്‍ ശ്രമിച്ചെങ്കിലും കടയിലെ സാധനങ്ങള്‍ മുഴുവനായി കത്തിനശിച്ചു. ഏകദേശം രണ്ടു ലക്ഷം രൂപയുടെ നഷ്ടം കണക്കാക്കുന്നു. കടയുടമയുടെ പരാതിയെ തുടര്‍ന്ന് പെരുമ്പടപ്പ് പൊലിസ് കേസെടുത്ത് അന്വേഷണം ആരംഭിച്ചു.