നിലമ്പൂര്‍: കേരള എന്‍ജിഒ അസോസിയേഷന്‍ നിലമ്പൂര്‍ ബ്രാഞ്ചിന്റെ നേതൃത്വത്തില്‍ നടത്തുന്ന സ്‌നേഹ സാന്ത്വനം പദ്ധതിക്ക് തുടക്കമായി. അസോസിയേഷന്‍ അംഗങ്ങള്‍ ഉള്‍പ്പെടെ സമൂഹത്തിലെ വിവിധ മേഖലകളിലുള്ള നിര്‍ധന കുടുംബത്തിലെ അര്‍ഹരായ രോഗികളെ കണ്ടെത്തി സഹായിക്കുന്നതാണ് പദ്ധതി. നിലമ്പൂര്‍ വ്യാപാരഭവനില്‍ നടന്ന ചടങ്ങില്‍ കെ.പി.സി.സി അംഗം ആര്യാടന്‍ ഷൗക്കത്ത് പദ്ധതി ഉദ്ഘാടനം ചെയ്തു. നിലമ്പൂര്‍ ബ്രാഞ്ച് പരിധിയില്‍ വരുന്ന നിര്‍ധന കുടുംബങ്ങളിലെ വിദ്യാര്‍ഥികള്‍ക്കുള്ള പഠനോപകരണങ്ങളുടെ വിതരണം കെ.പി.സി.സി സെക്രട്ടറി വി.എ കരീം ഉദ്ഘാടനം ചെയ്തു. നിലമ്പൂര്‍ ബ്രാഞ്ച് പ്രസിഡന്റ് കെ.പി പ്രശാന്ത് അധ്യക്ഷനായി. സംസ്ഥാന വൈസ് പ്രസിഡന്റ് പി. ഉണ്ണികൃഷ്ണന്‍, ജില്ലാ പ്രസിഡന്റ് വി.പി ദിനേശ്, നിലമ്പൂര്‍ ബ്ലോക്ക് കോണ്‍ഗ്രസ് പ്രസിഡന്റ് എ. ഗോപിനാഥ്, എന്‍.ജി.ഒ.എ ജില്ലാ സെക്രട്ടറി കെ.പി ജാഫര്‍, സംസ്ഥാന സെക്രട്ടറിയേറ്റ് അംഗങ്ങളായ ആര്‍. പ്രതാപ്, ശിവദാസന്‍ പിലാപ്പറമ്പില്‍ കൂടാതെ സി. വിഷ്ണുദാസ്, സുനില്‍ കാരക്കോട്, അഷ്‌റഫ് പാറശ്ശേരി, കെ ഷബീറലി, ഹബീബ് തോണിക്കടവന്‍, കെ സുബ്രഹ്മണ്യന്‍ തുടങ്ങിയവര്‍ സംസാരിച്ചു. സര്‍വിസില്‍ നിന്നും വിരമിച്ച പ്രവര്‍ത്തകര്‍ക്ക് യാത്രയയപ്പ് നല്‍കി. മെമ്പര്‍മാരുടെ മക്കളില്‍ പരീക്ഷകളില്‍ മികച്ച വിജയം നേടിയവരെ ആദരിച്ചു. വിവിധ മേഖലകളില്‍ മികവ് തെളിയിച്ച മുഹമ്മദ് ഇര്‍ഫാന്‍, സി.വി മുരളീധരന്‍ എന്നിവര്‍ക്ക് പുരസ്‌കാരവും നല്‍കി.