ലണ്ടന്‍: ഒരാഴ്ചത്തെ ഇടവേളക്ക് ശേഷം ഇന്ന് വീണ്ടും വിവിധ രാജ്യങ്ങളിലെ ഫുട്‌ബോള്‍ ലീഗുകള്‍ക്ക് തുടക്കമാകും. ഇംഗ്ലീഷ് പ്രീമിയര്‍ ലീഗ്, ലാലിഗ, ബുണ്ടസ്‌ലിഗ, സീരി എ, ഫ്രഞ്ച് ലീഗ് മത്സരങ്ങള്‍ക്കാണ് ഇന്ന് തുടക്കമാകുക. ലിവര്‍പൂളും മാഞ്ചസ്റ്റര്‍ സിറ്റിയും തമ്മില്‍ ഇഞ്ചോടിഞ്ച് പോരാട്ടം നടക്കുന്ന ഇംഗ്ലീഷ് പ്രീമിയര്‍ ലീഗില്‍ ഇന്ന് അഞ്ച് മത്സരങ്ങളുണ്ട്. വൈകിട്ട് അഞ്ചിന് നടക്കുന്ന മത്സരത്തില്‍ ലെസ്റ്റര്‍ സിറ്റിയും ടോട്ടനവും തമ്മില്‍ ഏറ്റുമുട്ടും. നിലവില്‍ എട്ട് പോയിന്റുമയി പട്ടികയില്‍ മൂന്നാം സ്ഥാനത്തുള്ള ടീമാണ് ടോട്ടനം. എട്ട് പോയിന്റുമായി ലെസ്റ്റര്‍ സിറ്റി അഞ്ചാം സ്ഥാനത്തും നില്‍ക്കുന്നു. രാത്രി 7.30ന് ബേണ്‍ലിയും നോര്‍വിച്ച് സിറ്റിയും തമ്മിലാണ് മത്സരം. ഇതേ സമയത്ത് തന്നെ എവര്‍ട്ടനും ഷെഫ് യുനൈറ്റഡും തമ്മില്‍ ഏറ്റുമുട്ടും. രണ്ടാം സ്ഥാനത്തുള്ള മാഞ്ചസ്റ്റര്‍ സിറ്റിക്ക് വാട്‌ഫോര്‍ഡാണ് എതിരാളികള്‍. ഒന്നാം സ്ഥാനത്തുള്ള ലിവര്‍പൂളുമായി അഞ്ച് പോയിന്റിന്റെ വ്യത്യാസമുള്ള സിറ്റിക്ക് ഇന്ന് നിര്‍ണായക പോരാട്ടമായിരിക്കും. രാത്രി 10ന് നടക്കുന്ന മത്സരത്തില്‍ ന്യൂകാസില്‍ യുനൈറ്റഡ് ബ്രൈറ്റണെ നേരിടും.

മുന്നേറാന്‍ ബാഴ്‌സ
ലാലിഗയില്‍ ബാഴ്‌സലോണയും അത്‌ലറ്റികോ മാഡ്രിഡും ഇന്ന് ഇറങ്ങുന്നുണ്ട്. വൈകിട്ട് 4.30ന് നടക്കുന്ന മത്സരത്തില്‍ വിയ്യാറയല്‍ വല്ലഡോളിഡിനെ നേരിടും. രാത്രി 7.30ന് നടക്കുന്ന മത്സരത്തില്‍ എയ്ബര്‍ ലെവെന്റെയെ നേരിടും. പട്ടികയില്‍ രണ്ടാം സ്ഥാനത്തുള്ള അത്‌ലറ്റികോ മാഡ്രിഡിന് സെല്‍റ്റാവിഗോയാണ് എതിരാളികള്‍. അഞ്ചാം സ്ഥാനത്തേക്ക് പിന്തള്ളപ്പെട്ട നിലവിലെ ജേതാക്കളായ ബാഴ്‌സലോണക്ക് ഗ്രാനഡയാണ് എതിരാളികള്‍. നാല് മത്സരങ്ങള്‍ കളിച്ച ബാഴ്‌സലോണ ഒരു സമനിലയും ഒരു തോല്‍വിയും വഴങ്ങി. ഇതാണ് പട്ടികയില്‍ പിറകിലേക്ക് പോകാന്‍ കാരണമായത്.

ഒന്നാമതാവാന്‍ ബയേണ്‍
ബുണ്ടസ്‌ലിഗയില്‍ ഇന്ന് അഞ്ച് മത്സരങ്ങളാണുള്ളത്. രാത്രി എഴിന് നടക്കുന്ന ആദ്യ മത്സരത്തില്‍ ഹെര്‍ത്ത ബെര്‍ലിന്‍ പെഡര്‍ബോണിനെ നേരിടും. നാലാം സ്ഥാനത്തുള്ള നിലവിലെ ചാംപ്യന്‍മാരായ ബയേണ്‍ മ്യൂണിക് എഫ്.സി കോളിനെ നേരിടും. മറ്റൊരു മത്സരത്തില്‍ ഓസ്ബര്‍ഗും ഫ്രര്‍ബര്‍ഗും തമ്മില്‍ കൊമ്പുകോര്‍ക്കും. ബയറും യൂനിയന്‍ ബര്‍ലിനും തമ്മിലാണ് മറ്റൊരു മത്സരം. പട്ടികയില്‍ ഒന്നാം സ്ഥാനത്ത് നില്‍ക്കുന്ന ലെപ്‌സിഗും വെര്‍ഡുറും തമ്മിലുള്ള മത്സരം രാത്രി 10നാണ്. നാല് മത്സരത്തില്‍ മൂന്ന് ജയവും ഒരു സമനിലയും ഉള്‍പ്പെടെ 10 പോയിന്റാണ് ലെപ്‌സിഗിനുള്ളത്.

തിരിച്ചെത്താന്‍ യുവന്റസ്
ഇറ്റാലിയന്‍ ലീഗില്‍ യുവന്റസ് ഇന്നിറങ്ങും. ലീഗില്‍ ഇന്ന് രണ്ട് മത്സരങ്ങളാണുള്ളത്. വൈകിട്ട് 6.30ന് നടക്കുന്ന മത്സരത്തില്‍ ഉഡിനീസ് ബ്രസിസിയയെ നേരിടും. രാത്രി 9.30ന് നടക്കുന്ന മത്സരത്തില്‍ നിലവിലെ ചാംപ്യന്‍മാരായ യുവന്റസ് വെറോണയുമായി ഏറ്റുമുട്ടും. നിലവില്‍ ഏഴ് പോയിന്റുമായി പട്ടികയില്‍ മൂന്നാം സ്ഥാനത്തുള്ള യുവന്റസിന് ഒന്നാം സ്ഥാനം തിരിച്ചുപിടിക്കണമെങ്കില്‍ ഇനിയുള്ള മത്സരങ്ങള്‍ ജയിച്ചേ തീരൂ. നിലവില്‍ 9 പോയിന്റുമായി ഇന്റര്‍മിലാന്‍ ഒന്നാം സ്ഥാനത്തും ഏഴ് പോയിന്റുമായി ബൊലോഗ്ന രണ്ടാം സ്ഥാനത്തുമാണുള്ളത്.

ഫ്രഞ്ച് ലീഗിലും കളികാര്യം
ഫ്രാന്‍സിലെ ലീഗ് വണില്‍ രാത്രി 9ന് തുടങ്ങുന്ന മത്സരത്തില്‍ മാഴ്‌സലേയും മോണ്ട്‌പെല്ലിയറും തമ്മില്‍ ഏറ്റുമുട്ടും. രാത്രി 11.30ന് നീസ് ഡിജോണിനെ നേരിടും. ഇതേ സമയത്ത് നടക്കുന്ന മറ്റൊരു മത്സരത്തില്‍ ബോര്‍ഡോക്‌സും ബ്രസ്റ്റും തമ്മിലാണ് പോരാട്ടം. മൊണാക്കോയും റെയിസും തമ്മിലാണ് മറ്റൊരു മത്സരം. മെറ്റ്
സും അമിയന്‍സും തമ്മിലും നെയിംസും ടുളോസും തമ്മിലും കൊമ്പുകോര്‍ക്കും.