റാവല്‍പിണ്ടി: പാക്കിസ്ഥാനില്‍ ബസ് നിയന്ത്രണം വിട്ട് മലയിലേക്ക് ഇടിച്ചുകയറി 26 യാത്രക്കാര്‍ മരിച്ചു. 16 സൈനികരുള്‍പ്പെടെ നാല്‍പ്പതോളംപേര്‍ ബസിലുണ്ടായിരുന്നതായാണ് ലഭിക്കുന്ന വിവരം. കുട്ടികളും സ്ത്രീകളും ഉള്‍പ്പെടെ മരിച്ചതായി ഗില്‍ഗിത്ബല്‍ജിസ്ഥാനിലെ മുഖ്യമന്ത്രിയുടെ വക്താവ് റഷീദ് അര്‍ഷാദ് സ്ഥിരീകരിച്ചു.

സ്‌കര്‍ദ്ദു നഗരത്തില്‍ നിന്നും റാവല്‍പിണ്ടിയിലേക്ക് പോവുകയായിരുന്ന ബസ് ആണ് അപകടത്തില്‍പ്പെട്ടത്. വടക്ക് പടിഞ്ഞാറന്‍ ഭാഗത്തായി സ്ഥിതി ചെയ്യുന്ന മലമ്പ്രദേശത്ത് വച്ച് ബസിന്റെ ബ്രേക്ക് തകരാറിലാകുകയും,ഒരു കുന്നിലേക്ക് ഇടിച്ച് കയറിയുമാണ് അപകടം ഉണ്ടായത്. സ്വകാര്യ കമ്പനിയുടെ ബസ് ആണ് അപകടത്തില്‍പ്പെട്ടത്. ബസിന്റെ നിയന്ത്രണം വിട്ടത് എങ്ങനെയാണെന്ന് തിരിച്ചറിഞ്ഞിട്ടില്ല. അപകടത്തില്‍ പരിക്കേറ്റവര്‍ക്ക് അടിയന്തര വൈദ്യ സഹായം നല്‍കാനായി ഹെലികോപ്റ്റര്‍ സേവനം ആവശ്യപ്പെട്ടിട്ടുണ്ടെന്ന് പൊലീസ് പറഞ്ഞതായും എക്‌സ്പ്രസ് ട്രിബ്യൂണ്‍ റിപ്പോര്‍ട്ട് ചെയ്തു.