തിരുവനന്തപുരം: കൊച്ചി മെട്രോ ഉദ്ഘാടന വേദിയില്‍ മെട്രോമാന്‍ ഇ. ശ്രീധരനും പ്രതിപക്ഷ നേതാവ് രമേശ് ചെന്നിത്തലയുമുണ്ടാകും. മുഖ്യമന്ത്രിയുടെ ഓഫിസിന് ഇതു സംബന്ധിച്ച അറിയിപ്പ് ലഭിച്ചു.

കൊച്ചി മെട്രോയുടെ ഉദ്ഘാടനവേദിയില്‍ ഇ ശ്രീധരന് ഇടം നല്‍കാതിരുന്നത് വന്‍ പ്രതിഷേധങ്ങള്‍ക്ക് ഇടവെച്ചിരുന്നു. ഇതിനെ തുടര്‍ന്ന് ഉദ്ഘാടന വേദിയില്‍ ഇരിക്കുന്നവരുടെ പട്ടിക വിപുലീകരിക്കണമെന്ന് ആവശ്യപ്പെട്ട് സംസ്ഥാന സര്‍ക്കാര്‍ പ്രധാനമന്ത്രിയുടെ ഓഫിസിനെ സമീപിച്ചിരുന്നു.

ഡോ. ഇ ശ്രീധരന്‍, പ്രതിപക്ഷ നേതാവ് രമേശ് ചെന്നിത്തല, സ്ഥലം എം.എല്‍.എ പി.ടി.തോമസ് എന്നിവരെകൂടി ഉള്‍പ്പെടുത്തണമെന്ന് അപേക്ഷിച്ച് ചീഫ് സെക്രട്ടറി നളിനി നെറ്റോയാണ് പ്രധാനമന്ത്രിയുടെ ഓഫിസിന് കത്തയച്ചത്. എന്നാല്‍ ചെന്നിത്തലയെയും ശ്രീധരനേയും ഉള്‍പ്പെടുത്തിയെങ്കിലും  പി ടി തോമസ് എംഎല്‍എയുടെ പേര് ഉള്‍പ്പെടുത്തണമെന്ന ആവശ്യം അംഗീകരിച്ചില്ല.

സംസ്ഥാന സര്‍ക്കാര്‍ അയച്ച ലിസ്റ്റില്‍ നിന്നു പ്രധാനമന്ത്രിയുടെ ഓഫിസാണ് ഇ ശ്രീധരനടക്കമുള്ള ആറുപേരെ ഒഴിവാക്കിയത്.  സംസ്ഥാന സര്‍ക്കാര്‍ തയാറാക്കിയ പട്ടിക അനുസരിച്ച് 17 പേര്‍ക്ക് വേദിയില്‍ ഇരിപ്പിടമുണ്ടായിരുന്നു.

10 പേര്‍ക്ക് സംസാരിക്കാനുളള അവസരവും. പ്രധാനമന്ത്രി നരേന്ദ്രമോദി, മുഖ്യമന്ത്രി പിണറായി വിജയന്‍, കേന്ദ്രമന്ത്രി വെങ്കയ്യ നായിഡു, ഗവര്‍ണര്‍ പി.സദാശിവം, പ്രതിപക്ഷനേതാവ് രമേശ് ചെന്നിത്തല, ഡോ. ഇ.ശ്രീധരന്‍, കെ.വി.തോമസ് എം.പി, പി.ടി. തോമസ് എം.എല്‍.എ, കെ.എം.ആര്‍.എല്‍ എം.ഡി. ഏലിയാസ് ജോര്‍ജ് എന്നിവര്‍ക്കായിരുന്നു സംസാരിക്കാന്‍ അവസരം. എന്നാല്‍ ഈ പട്ടിക പ്രധാനമന്ത്രിയുടെ ഓഫിസ് വെട്ടിച്ചുരുക്കുകയായിരുന്നു.

പ്രധാനമന്ത്രിയുടെ ഓഫിസ് സംസ്ഥാന സര്‍ക്കാരിന് തിരികെ അയച്ച ലിസ്റ്റ് പ്രകാരം പ്രധാനമന്ത്രി, മുഖ്യമന്ത്രി, കേന്ദ്രമന്ത്രി വെങ്കയ്യ നായിഡു, ഗവര്‍ണര്‍ പി.സദാശിവം, കെ.വി തോമസ് എം.പി, മന്ത്രി തോമസ് ചാണ്ടി, മേയര്‍ സൗമിനി ജെയിന്‍ എന്നീ ഏഴുപേരേ വേദിയിലിരുത്താനായിരുന്നു നീക്കം.

17നു രാവിലെ 11നാണ് കലൂര്‍ ജവഹര്‍ലാല്‍ നെഹ്‌റു സ്റ്റേഡിയത്തില്‍ പ്രധാനമന്ത്രി നരേന്ദ്രമോദി കൊച്ചി മെട്രോയുടെ ഉദ്ഘാടനം നിര്‍വഹിക്കുക.