പുതുക്കാട്: കണ്ണംമ്പത്തൂരില്‍ അമ്പതിലേറെ പേര്‍ക്കു ഭക്ഷ്യവിഷബാധയേറ്റതിനെ തുടര്‍ന്ന് തൃക്കൂര്‍ പഞ്ചായത്തില്‍ ആരോഗ്യ വകുപ്പിന്റെ നേതൃത്വത്തില്‍ പരിശോധന നടത്തി.
ലൈസന്‍സ് ഇല്ലാതെ വൃത്തിഹീനമായ സാഹചര്യത്തില്‍ പ്രവര്‍ത്തിച്ചിരുന്ന പഞ്ചായത്തിലെ ആറു കാറ്ററിങ് സ്ഥാപനങ്ങള്‍ അധികൃതര്‍ പൂട്ടിച്ചു. ഇവരില്‍ നിന്നു പിഴ ഈടാക്കാനും തീരുമാനിച്ചു. പുതുക്കാട് ഭക്ഷ്യവിഷബാധക്ക് ഇടയാക്കിയ തൃക്കൂരിലെ രണ്ടു കാറ്ററിങ് സ്ഥാപനങ്ങള്‍ കഴിഞ്ഞ ദിവസം ആരോഗ്യ വകുപ്പ് അടച്ചു പൂട്ടിച്ചിരുന്നു.
പഞ്ചായത്തിലെ ഭൂരിഭാഗം ഭക്ഷണ വിതരണ സ്ഥാപനങ്ങളും പ്രവര്‍ത്തിക്കുന്നത് അടിസ്ഥാന സൗകര്യങ്ങളില്ലാതെയാണെന്നു അധികൃതര്‍ അറിയിച്ചു. ഇത്തരം സ്ഥാപനങ്ങളില്‍ ജോലി ചെയ്യുന്ന തൊഴിലാളികള്‍ക്ക് ഹെല്‍ത്ത് കാര്‍ഡ് നിര്‍ബന്ധമാക്കുവാനും അധികൃതര്‍ നിര്‍ദേശിച്ചു. ആരോഗ്യ വകുപ്പിന്റെ പരിശോധനയെ തുടര്‍ന്ന് തൃക്കൂര്‍ പഞ്ചായത്തില്‍ അവലോകനയോഗം ചേര്‍ന്നു. വൈസ് പ്രസിഡന്റ് കെ.സി സന്തോഷ് അധ്യക്ഷനായി. മെഡിക്കല്‍ ഓഫിസര്‍ ഡോ. ഷീന വാസു, ഹെല്‍ത്ത് ഇന്‍സ്‌പെക്ടര്‍ പി.വി സജി, പഞ്ചായത്ത് അംഗങ്ങള്‍ പങ്കെടുത്തു. പഞ്ചായത്തിലെ എല്ലാ കാറ്ററിങ് സ്ഥാപനങ്ങള്‍, ഹോട്ടലുകള്‍, ഭക്ഷണ വിതരണ സ്ഥാപനങ്ങള്‍, ബേക്കറികള്‍ എന്നിവിടങ്ങളില്‍ പരിശോധന കര്‍ശനമാക്കുവാനും യോഗത്തില്‍ തീരുമാനമായി. തുടര്‍ ദിവസങ്ങളില്‍ ബോധവല്‍ക്കരണ ക്ലാസ് നടത്തുവാനും യോഗത്തില്‍ ധാരണയായി.