കൊല്ലം - തിരുമംഗലം ദേശീയപാത: നിര്മാണം പുരോഗമിക്കുന്നു
പുനലൂര്: കൊല്ലം - തിരുമംഗലം ദേശീയപാതയുടെ പുനലൂര് സെക്ഷന്റെ ചുമതലയിലുള്ള ഇരുപതു കിലോമീറ്റര് പാതയിലെ നിര്മാണം പുരോഗമിക്കുന്നു. നിര്മാണത്തിന്റെ ഭാഗമായി പുനലൂര് - വളക്കോട് ഭാഗത്തെ ഗാബിയന് ഭിത്തിയുടെ നിര്മാണം അവസാന ഘട്ടത്തിലാണ്. രണ്ടു കോടി നാല്പത്തി ഒന്നു ലക്ഷം രൂപയാണ് നൂറ്റിപ്പത്തു മീറ്റര് ദൂരം ഭിത്തി പണിയുന്നതിന് വകയിരുത്തിയിരിക്കുന്നത്. പതിനെട്ടടി വീതിയില് മുപ്പതടി ഉയരത്തിലാണ് ഗാബിയന് ഭിത്തി നിര്മിക്കുന്നത്. മൂന്നു ബ്ലോക്കുകളിലായി ഇരുപതടി ഉയരത്തിലും, 15 അടി ഉയരത്തിലുമായി നിര്മാണം അവസാന ഘട്ടത്തിലാണ്.
രണ്ടു ഭിത്തികളായി ഒരു മീറ്റര് വീതം ഉയരമുള്ള ബോക്സുകളായി ഗാല്വനൈസ്ഡ് വയറുകള് കൊണ്ടു നിര്മിച്ച പെട്ടികളുണ്ടാക്കി അതില് കല്ലുകള് അടുക്കിയാണ് ഭിത്തി പണിതുയര്ത്തുന്നത്. പണി പൂര്ത്തിയാകുമ്പോള് ഈ ഭാഗങ്ങളിലെ ഹൈവേയുടെ വീതി നാല്പത്തിയഞ്ചു അടി ആയി മാറും. പാതയോരങ്ങളില് അപായ സോണുകളില് മുമ്പു പണിതുയര്ത്തിയ കോണ്ക്രീറ്റു ഭിത്തികളും കല്ലുകൊണ്ടു പണിതഭിത്തികളും ഇടിഞ്ഞു പോയതുകൊണ്ടാണ് ആധുനിക സാകേതികവിദ്യ ഉപയോഗിക്കുന്ന ഗാബിയന് ഭിത്തി നിര്മ്മാണം സ്വീകരിക്കുന്നതെന്ന് ദേശീയപാത എന്ജിനീയര് പറഞ്ഞു.
Comments (0)
Disclaimer: "The website reserves the right to moderate, edit, or remove any comments that violate the guidelines or terms of service."