പാവറട്ടി: നാടിനെ വലിയ വിപത്തിലേക്ക് തള്ളിയിട്ട ലഹരിമാഫിയക്കെതിരെ നാട്ടുകാര്‍ രംഗത്ത്.
തീരദേശമേഖലയെ കാര്‍ന്നുതിന്നുകൊണ്ടിരിക്കുന്ന ലഹരിമാഫിയകളുടെ വിഹാരത്തിനെ കുറിച്ചു സുപ്രഭാതം വാര്‍ത്ത പ്രസിദ്ധീകരിച്ചിരുന്നു. വ്യക്തമായ പ്ലാനിങ്ങോടെയും ട്രെയിനിങ്ങോടെയും വിദ്യാര്‍ഥികളെ മുഖ്യകരുക്കളാക്കിയാണ് ലഹരി മാഫിയയുടെ പ്രവര്‍ത്തനം.
മൂന്നു നാലു ദിവസങ്ങളിലായി അര്‍ധരാത്രിയിലടക്കം ശക്തമായ പൊലിസ് പെട്രോളിങും പരിശോധനയും ഈ മേഖലയില്‍ നടത്തിവരുന്നുണ്ട്. പല കുടുംബങ്ങളുടെയും മനസമാധാനം നഷ്ടപ്പെടുത്തി വിദ്യാര്‍ഥികള്‍ ലഹരിക്ക് അടിമയായ വാര്‍ത്ത പുറത്തു വന്നതോടെ വിവിധ ക്ലബുകളും സാംസ്‌കാരിക സംഘടനകളും മത-രാഷ്ട്രീയ പാര്‍ട്ടികളും എല്ലാം ലഹരിക്കെതിരേ ശക്തമായ നടപടികള്‍ക്കൊരുങ്ങുകയാണ്. ഷൈനിസ്റ്റാര്‍ ടെമ്പിള്‍ സിറ്റി, ലാസിയോണ്‍ കൂരിക്കാട്, പി.സി.സി കൈതമുക്ക്, ഗാന്ധിജി ആര്‍ട്‌സ് ആന്‍ഡ് സ്‌പോര്‍ട്‌സ് ക്ലബ് വെന്മേനാട്, തജ്‌നീദ് മരുതയൂര്‍, തരംഗിണി കലാവേദി ചുക്കുബസാര്‍ തുടങ്ങിയ ക്ലബുകളും രാഷ്ട്രീയ-സാംസ്‌കാരിക സംഘടനകളും, പ്രവാസി സുഹൃത്തുക്കളും ലഹരിക്കെതിരേ പ്രവര്‍ത്തനങ്ങള്‍ ആരംഭിച്ചുകഴിഞ്ഞു.
വിദ്യാലയ അധികൃതരേ നോക്കുകുത്തികളാക്കി പുതിയ തന്ത്രങ്ങളുമായാണ് ലഹരി മാഫിയ. ഇന്റര്‍വെല്‍ സമയത്തും ലഞ്ച് സമയത്തും അതാത് വിദ്യാലയങ്ങളിലെ യൂണിഫോം ധരിച്ചാണ് ലഹരി മാഫിയ വിദ്യാര്‍ഥികള്‍ക്ക് ലഹരി സാധനങ്ങള്‍ വില്‍ക്കുന്നത്. വിദ്യാലയത്തിനുള്ളില്‍ യൂണിഫോം ധരിച്ചെത്തുന്ന ഇത്തരക്കാരെ പെട്ടെന്നു മനസിലാക്കാന്‍ അധികൃതര്‍ക്കാവുന്നില്ല.
ഈ മേഖലയില്‍പെട്ട ഒരു വിദ്യാലയത്തില്‍ ഇത്തരം രൂപത്തില്‍ കണ്ടതോടെയാണ് വിദ്യാലയങ്ങളിലെ ലഹരി മാഫിയയുടെ പുതിയ വിപണനതന്ത്രം മനസിലായത്. ഇതിനെതിരേ ജാഗരൂകരാവുകയാണ് അധികൃതര്‍. സംശയാസ്പദമായി മറ്റു ജില്ലാരജിസ്‌ട്രേഷന്‍ വാഹനങ്ങള്‍ വിലസുന്നുണ്ട്. കണ്ണൂര്‍, കാസര്‍കോട് രജിസ്‌ട്രേഷന്‍ വാഹനങ്ങള്‍ അസമയങ്ങളില്‍ ഈ മേഖലയില്‍ ധാരാളമായി കാണുന്നതായി നാട്ടുകാര്‍ പരാതിപ്പെടുന്നു. ഇവരോടൊപ്പം ബൈക്കുകളും ധാരാളം കറങ്ങി നടക്കുന്നുണ്ട്.