കാഞ്ഞങ്ങാട്: മാധ്യമപ്രവര്‍ത്തകനും ഉത്തര കേരളത്തിലെ രാഷ്ട്രീയ സാമൂഹ്യ മേഖലകളില്‍ നിറ സാന്നിധ്യവുമായിരുന്ന ടി.കെ.കെ നായരുടെ സ്മരണയ്ക്കായി കാഞ്ഞങ്ങാട് കേന്ദ്രമായി പ്രവര്‍ത്തിക്കുന്ന ടി.കെ.കെ ഫൗണ്ടേഷന്‍ ഏര്‍പ്പെടുത്തിയ 13ാമത് പുരസ്‌കാരം മുതിര്‍ന്ന ചിത്രകാരനും കാറഡുക്ക കാഞ്ചന്‍ഗംഗ കലാഗ്രാമം സ്ഥാപകനുമായ പി.എസ് പുണിഞ്ചിത്തായക്ക് സമര്‍പ്പിക്കുമെന്ന് ഫൗണ്ടേഷന്‍ ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. കേരളം, കര്‍ണാടക സംസ്ഥാനങ്ങളുടെ ലളിതകലാ അക്കാദമി പുരസ്‌കാരം ഉള്‍പ്പെടെ നേടിയ പി.എസ് പുണിഞ്ചിത്തായ ഇരു സംസ്ഥാനങ്ങളിലും ആര്‍ട്ട് ഗാലറികള്‍ സ്ഥാപിക്കുന്നതിന് മുന്‍നിരയില്‍ പ്രവര്‍ത്തിച്ചിട്ടുണ്ട്.
ഒക്ടോബര്‍ ഒന്‍പതിന് വൈകിട്ട് നാലിന് കാഞ്ഞങ്ങാട് പ്രസ്‌ഫോറം ഹാളില്‍ നടക്കുന്ന ചടങ്ങില്‍ കെ. രാജ്‌മോഹന്‍ ഉണ്ണിത്താന്‍ എം.പി പുണിഞ്ചിത്തായക്ക് ടി.കെ.കെ പുരസ്‌കാരം സമര്‍പ്പിക്കും.