പനമരം: പനമരം പൊതുമരാമത്ത് വകുപ്പ് ഓഫിസിനു മുന്നില്‍ കൂട്ടിയിട്ട ലക്ഷങ്ങള്‍ വിലവരുന്ന മരങ്ങള്‍ നശിക്കുന്നു. ഒരു വര്‍ഷം മുമ്പ് കൊണ്ടുവന്നിട്ട മരങ്ങളാണ് അധികൃതരുടെ മൂക്കിന് താഴെ കിടന്ന് നശിക്കുന്നത്. ഒന്നര വര്‍ഷം മുമ്പ് എറണാകുളം ജില്ലയില്‍ ഓടികൊണ്ടിരിക്കെ സ്‌കൂള്‍ ബസിന് മുകളിലേക്ക് വന്‍മരം കടപുഴകിയുണ്ടായ അപകടത്തെ തുടര്‍ന്ന് റോഡരികിലെ അപകട ഭീഷണിയുയര്‍ത്തുന്ന മരങ്ങള്‍ മുറിക്കാന്‍ സര്‍ക്കാര്‍ ഉത്തരവിട്ടിരുന്നു.
ഇതിന്റെ അടിസ്ഥാനത്തില്‍ പനമരം പഞ്ചായത്തിലെ വിവിധ പ്രദേശങ്ങളില്‍ നിന്ന് മുറിച്ച മരങ്ങളാണ് പൊതുമരാമത്ത് ഓഫിസിന് മുന്‍വശത്ത് ഇറക്കിവച്ചത്.
മരങ്ങള്‍ നശിച്ച് ലക്ഷങ്ങളുടെ നഷ്ടമുണ്ടാകുന്നത് പുറമേ കാല്‍നടയാത്രക്കാര്‍ക്കും ഏറെ ദുരിതമാകുകയാണ്. വാഹനാപകടങ്ങള്‍ക്കും ഇതു കാരണമാകുന്നുണ്ട്.
വനം വകുപ്പ് മരം അളക്കാത്തതിനാലാണ് ലേലത്തിന് വെക്കാന്‍ തടസ്സമാകുന്നതെന്നാണ് പൊതുമരാമത്ത് അധികൃതര്‍ നല്‍കുന്ന വിശദീകരണം. റോഡരികിലെ മരങ്ങള്‍ നീക്കം ചെയ്യാന്‍ അടിയന്തര നടപടിയുണ്ടാകണമെന്ന ആവശ്യം ശക്തമാകുകയാണ്.