കൊച്ചി: 22 ാമത് കൊച്ചി അന്താരാഷ്ട്ര പുസ്തകോത്സവത്തോടനുബന്ധിച്ച് പ്രഖ്യാപിച്ച പ്രഥമ ലീലാ മേനോന്‍ മാധ്യമ പുരസ്‌കാരങ്ങള്‍ വിതരണം ചെയ്തു. എറണാകുളത്തപ്പന്‍ ഗ്രൗണ്ടില്‍ നടന്ന ചടങ്ങില്‍ മുതിര്‍ന്ന മാധ്യമപ്രവര്‍ത്തകന്‍ വി.പി രാമചന്ദ്രന്‍ പുരസ്‌കാര വിതരണം നിര്‍വഹിച്ചു. യു.ഡി.എഫ് കണ്‍വീനര്‍ ബെന്നി ബെഹന്നാന്‍ മുഖ്യാതിഥിയായി.
അച്ചടി മാധ്യമരംഗത്തെ മികച്ച റിപ്പോര്‍ട്ടര്‍ക്കുള്ള പുരസ്‌കാരം 'സുപ്രഭാതം' മലപ്പുറം യൂനിറ്റിലെ സബ് എഡിറ്റര്‍ ഗീതു തമ്പി ഏറ്റുവാങ്ങി. ജനുവരി 17 മുതല്‍ 21 വരെ സുപ്രഭാതം ദിനപത്രത്തില്‍ പ്രസിദ്ധീകരിച്ച 'എവിടെ പോയി നമ്മുടെ കുഞ്ഞുങ്ങള്‍' എന്ന വാര്‍ത്താപരമ്പരക്കാണ് കാഷ് പ്രൈസും ഫലകവും അടങ്ങുന്ന പുരസ്‌കാരം ലഭിച്ചത്. മികച്ച ഫോട്ടോഗ്രാഫര്‍ക്കുള്ള പുരസ്‌കാരം ദി ന്യൂ ഇന്ത്യന്‍ എക്‌സ്പ്രസിലെ അരുണ്‍ ഏഞ്ചല ഏറ്റുവാങ്ങി. ദൃശ്യ മാധ്യമരംഗത്തെ മികച്ച റിപ്പോര്‍ട്ടര്‍ക്കുള്ള പുരസ്‌കാരം ജനം ടി.വിയിലെ അരുണ്‍ കൊടുങ്ങൂരും കാമറാമാനുള്ള പുരസ്‌കാരം അമൃത ടി.വിയിലെ പി. ശശികാന്തും ഏറ്റുവാങ്ങി. സമഗ്ര സംഭാവനക്കുള്ള പുരസ്‌കാരം ഇന്ത്യന്‍ എക്‌സ്പ്രസ് മുന്‍ അസി. എഡിറ്റര്‍ പി. വേണുഗോപാല്‍ ഏറ്റുവാങ്ങി. ചടങ്ങില്‍ പി. സുജാതന്‍ അധ്യക്ഷനായി. ടി. സതീശന്‍ സ്വാഗതവും ജെ. വിനോദ്കുമാര്‍ നന്ദിയും പറഞ്ഞു.