കല്‍പ്പറ്റ: കുത്തഴിഞ്ഞ വിദ്യാഭ്യാസ രംഗം നേരെയാക്കുന്നതിന് ജില്ലയില്‍ വിദ്യാഭ്യാസ ഉപഡയറക്ടറെ അടിയന്തിരമായി നിയമിക്കണമെന്നും ഹയര്‍സെക്കന്‍ഡറി അധ്യാപകര്‍ക്ക് തസ്തിക നിര്‍ണയവും നിയമനാംഗീകാരവും നല്‍കണമെന്നും കേരള സ്‌കുള്‍ ടീച്ചേഴ്‌സ് യൂണിയന്‍(കെ.എസ്.ടി.യു) ആവശ്യപ്പെട്ടു. അധ്യയന വര്‍ഷം തുടങ്ങി ഒരു മാസമായിട്ടും ജില്ലയില്‍ വിദ്യാഭ്യാസ വകുപ്പിന്റെ മേധാവിയായ ഉപഡയറക്ടറുടെ തസ്തിക ഒഴിഞ്ഞ് കിടക്കുകയാണ്. കീഴ്‌വഴക്കമനുസരിച്ച് ഡി.ഡി.ഇയുടെ ചുമതല ജില്ലാ വിദ്യാഭ്യാസ ഓഫിസര്‍ക്കാണ് നല്‍കുക. എന്നാല്‍ അക്കൗണ്ട് ഓഫിസര്‍ക്കാണ് ചുമതല നല്‍കിയിരിക്കുന്നത്.
ഡി.ഡി.ഇ നിയമനം നീട്ടികൊണ്ട് പോകുന്നത് കാരണം പി.എഫ് തുക പിന്‍വലിക്കലും അധ്യാപക നിയമനവും സ്ഥലംമാറ്റവും നടക്കുന്നില്ല. എസ്.എസ്.എല്‍.സി പരീക്ഷയില്‍ കനത്ത പരാജയം ഏറ്റുവാങ്ങിയിട്ടും ഡി.ഡി.ഇയെ നിയമിക്കാതെ വിദ്യാഭ്യാസ വകുപ്പ് ജില്ലയെ അവഗണിക്കുകയാണ്. കെ.എസ്.ടി.യു ജില്ലാതല മെമ്പര്‍ഷിപ്പ് വിതരണോദ്ഘാടനം മുസ്‌ലിംലീഗ് ജില്ലാ സെക്രട്ടറി ടി മുഹമ്മദ് നായ്ക്കട്ടി എ.എല്‍.പി സ്‌കുള്‍ അധ്യാപിക എം.യു സല്‍മക്ക് നല്‍കി നിര്‍വഹിച്ചു. പ്രസിഡന്റ് പി.പി മുഹമ്മദ് അധ്യക്ഷനായി. സുല്‍ത്താന്‍ ബത്തേരി ഉപജില്ലാ പ്രസിഡന്റ് എം.പി മുസ്തഫ, എന്‍.കെ അസൈന്‍, സി.എം ലീല, പ്രിയ ജോസ്, കെ.പി വല്‍സ, സി.കെ ജാഫര്‍, പി.എംജൗഹര്‍, എം.എം സലീനാമ്മ, പി.കെ ഹാരിസ്, എന്‍.ജെ സലീന, ടി.കെ സാദിഖ്, ഇ.ടി റിഷാദ് സംസാരിച്ചു.