ന്യൂഡല്‍ഹി: കഴിഞ്ഞ പൊതുതെരഞ്ഞെടുപ്പില്‍ മോദി വാഗ്ദാനം ചെയ്തിരുന്നത് വികസനം, യുവാക്കള്‍ക്ക് തൊഴില്‍, വിദേശത്ത് നിക്ഷേപിച്ച കള്ളപ്പണം എന്നിവ പിടിച്ചെടുത്ത് ജനങ്ങളുടെ അക്കൗണ്ടില്‍ നിക്ഷേപിക്കുമെന്നായിരുന്നു.
ഇത്തവണത്തെ തെരഞ്ഞെടുപ്പില്‍ മോദി വാഗ്ദാനം ചെയ്യുന്നത് അയോധ്യയില്‍ ക്ഷേത്രനിര്‍മാണം, പ്രതിമകള്‍ സ്ഥാപിക്കല്‍, തൊഴിലില്ലായ്മാവേതനം എന്നിവയാണെന്ന് കോണ്‍ഗ്രസ് നേതാവ് പി. ചിദംബരം. 2014ല്‍ മോദി അധികാരത്തില്‍ കയറാനായി ജനങ്ങള്‍ക്ക് നല്‍കിയ ഉറപ്പുകളൊന്നുപോലും നടപ്പാക്കാന്‍ അദ്ദേഹത്തിന് കഴിഞ്ഞിട്ടില്ല.
അഞ്ചുവര്‍ഷത്തെ ഭരണത്തില്‍ അദ്ദേഹം എന്താണ് നേടിയതെന്ന് ചോദിച്ചാല്‍ ഒന്നുമില്ലെന്നാണ് വ്യക്തമാകുകയെന്നും അദ്ദേഹം ആരോപിച്ചു. പട്ടേലിന്റെ പ്രതിമ സ്ഥാപിച്ചതാണ് മോദി തന്റെ ഭരണ നേട്ടമായി വാഗ്ദാനം ചെയ്യുന്നത്. അടുത്തത് അയോധ്യയില്‍ രാമക്ഷേത്രം നിര്‍മിക്കുമെന്നാണ്. ജനങ്ങളുടെ ആഗ്രഹത്തിനൊത്ത് ഭരണംനടത്താന്‍ മോദിക്ക് കഴിഞ്ഞിട്ടില്ലെന്നതാണ് യാഥാര്‍ഥ്യമെന്നും അദ്ദേഹം പറഞ്ഞു.