തിരുവനന്തപുരം: ഉപ തിരഞ്ഞെടുപ്പിലെ സ്ഥാനാര്‍ഥി ചിത്രം യു.ഡി.എഫിലും എല്‍.ഡി.എഫിലും വ്യക്തമായപ്പോള്‍ ബി.ജെ.പി പുതിയ സ്ഥാനാര്‍ഥി ലിസ്റ്റുമായി രംഗത്ത്. ആര്‍.എസ്.എസിന്റെ താത്പര്യപ്രകാരം തയാറാക്കിയ ലിസ്റ്റില്‍ കുമ്മനം രാജശേഖരനും കെ.സുരേന്ദ്രനുമുണ്ട്.
വട്ടിയൂര്‍ക്കാവില്‍ കുമ്മനം രാജശേഖരനും കോന്നിയില്‍ കെ.സുരേന്ദ്രനും മത്സരിക്കണമെന്നുതന്നെയാണ് ആര്‍.എസ്.എസ് നിലപാട്. കുമ്മനത്തെ വീണ്ടും മല്‍സരിപ്പിക്കാന്‍ ആര്‍.എസ്.എസ് താല്‍പര്യം കാണിച്ചിരുന്നില്ല. തോല്‍ക്കാനായി മാത്രമൊരാള്‍ എന്ന രീതിയിലേക്ക് അദ്ദേഹത്തെ പരീക്ഷിക്കപ്പെട്ടതില്‍ കടുത്ത നിരാശയിലായിരുന്നു ആര്‍.എസ്.എസ്. ഇതും ബി.ജെ.പി സ്ഥാനാര്‍ഥി നിര്‍ണയം അനിശ്ചിതത്വത്തിലാക്കി. എന്നാല്‍ വട്ടിയൂര്‍ക്കാവില്‍ ഒരിക്കല്‍കൂടി ഈ പരീക്ഷണം നടത്തിയാല്‍ വിജയിക്കാമെന്നാണെത്രെ കണക്കുകൂട്ടല്‍.

വട്ടിയൂര്‍ക്കാവിലേക്ക് മേയര്‍ വി.കെ പ്രശാന്തിനെ എല്‍.ഡി.എഫ് സ്ഥാനാര്‍ഥിയാക്കിയതും കെ.മോഹന്‍കുമാറിനെ യു.ഡി.എഫും കളത്തിലിറക്കിയതോടെ ശക്തനായ സ്ഥാനാര്‍ഥി വേണമെന്ന നിലപാടിലാണ് ബി.ജെ.പിയും. ഇതോടെയാണ് കുമ്മനത്തിന്റെ സ്ഥാനാര്‍ഥിത്വത്തിന് ആര്‍.എസ്.എസും നിര്‍ബന്ധിച്ചത്.

ലോക്സഭാ തിരഞ്ഞെടുപ്പില്‍ പത്തനംതിട്ടയിലെ മുന്നേറ്റമാണ് കോന്നിയില്‍ കെ.സുരേന്ദ്രനെ പരിഗണിക്കാനുള്ള കാരണം. ഇരുവരും ഇത്തവണ എന്തായാലും മത്സരിക്കണമെന്നു തന്നെ ആര്‍.എസ്. എസും അഭിപ്രായപ്പെട്ട അവസരത്തിലാണ് ഇരുവരും മത്സരിക്കാന്‍ തയാറെടുക്കുന്നത്.