പാലക്കാട്: ജൂലൈ രണ്ട് ഒ.വി. വിജയന്‍ ജന്മദിനം രണ്ടു ദിവസം നീണ്ടു നില്‍ക്കുന്ന പരിപാടികളോടെ സമുചിതമായി ആഘോഷിക്കാന്‍ ഒ.വി. വിജയന്‍ സ്മാരക ഭരണസമിതി തസ്രാക്കില്‍ സ്മാരക മന്ദിരത്തില്‍ ചെയര്‍മാന്‍ ടി.കെ. നാരായണദാസിന്റെ അധ്യക്ഷതയില്‍ യോഗം ചേര്‍ന്ന് തീരുമാനിച്ചു.
ജൂലായ് രണ്ടിനും മൂന്നിനും തസ്രാക്കിലെ സ്മാരകത്തില്‍ സംഘടിപ്പിക്കുന്ന പരിപാടിയില്‍ പ്രതിമ അനാച്ഛാദനം, മലമ്പുഴ കനാല്‍ സമീപത്ത് സമിതി ഒരുക്കുന്ന വഴിയമ്പലത്തിന്റെ ഉദ്ഘാടനം, സെമിനാര്‍ ഹാളിന്റെ ഉദ്ഘാടനം നടക്കും. വിജയ കാര്‍ട്ടൂണുകളെക്കുറിച്ചും ചെറുകഥകളെക്കുറിച്ചും ലേഖനങ്ങളെക്കുറിച്ചും ഉള്ള പ്രഭാഷണങ്ങള്‍ ആയിരിക്കും പരിപാടിയുടെ പ്രത്യേകത.
സാംസ്‌കാരിക വകുപ്പ് മന്ത്രി എ.കെ. ബാലന്‍, നിയമസഭാ സ്പീക്കര്‍ ശിവരാമകൃഷ്ണന്‍, എം.ബി. രാജേഷ് എം.പി, സാഹിത്യകാരന്മാര്‍ എന്നിവരെ പങ്കെടുപ്പിക്കാന്‍ തീരുമാനിച്ചു.
ആഗസ്‌ററ് മാസത്തില്‍ അയ്യപ്പപ്പണിക്കര്‍ ഫൗണ്ടേഷനും പാലക്കാട് ജില്ലാ പബ്ലിക് ലൈബ്രറിയുമായും സഹകരിച്ച് സംയുക്തമായി 25 വയസുവരെയുള്ള യുവകവികള്‍ക്ക് ഒ.വി. വിജയന്‍ സ്മാരകത്തില്‍ വച്ച് കവിതാ ശില്‍പശാല സംഘടിപ്പിക്കും. എല്ലാ മാസവും പ്രമുഖ പ്രഭാഷകരെയും സാഹിത്യകാരന്മാരെയും പങ്കെടുപ്പിച്ച് ഒ.വി. വിജയന്‍ സ്മാരക പ്രഭാഷണങ്ങള്‍ നടത്താനും യോഗം തീരുമാനിച്ചു.
സെക്രട്ടറി ടി.ആര്‍. അജയന്‍ പ്രവര്‍ത്തന റിപ്പോര്‍ട്ട് അവതരിപ്പിച്ചു. യോഗത്തില്‍ ഭരണസമിതി അംഗങ്ങളായ പാലക്കാട് ജില്ലാ പഞ്ചായത്ത് പ്രസിഡന്റ് അഡ്വ. കെ. ശാന്തകുമാരി, വൈസ് ചെയര്‍മാന്‍ ശ്രീ. ആഷാമേനോന്‍, പ്രൊഫ. സി.പി. ചിത്രഭാനു, പ്രൊഫ. പി.എ. വാസുദേവന്‍, പ്രൊഫ. സി. സോമശേഖരന്‍, കെ.പി. രമേഷ്, എ.കെ. ചന്ദ്രന്‍കുട്ടി, റഷീദ് കണിച്ചേരി, ജ്യോതിബായ് പരിയാടത്ത്, കൊടുമ്പ് പഞ്ചായത്ത് പ്രസിഡന്റ് എസ്. ഷൈലജ പങ്കെടുത്തു.