നെടുമ്പാശ്ശേരി: ദേശീയ പാതയില്‍ കരിയാട് വളവിലും അത്താണി കുറുന്തലക്കോട്ട് ചിറക്ക് സമീപവും സംരക്ഷണഭിത്തി നിര്‍മിക്കണമെന്നാവശ്യപ്പെട്ട് കോണ്‍ഗ്രസ് മണ്ഡലം കമ്മിറ്റിയുടെ നേതൃത്വത്തില്‍ മനുഷ്യ സംരക്ഷണ ഭിത്തി തീര്‍ത്ത് പ്രതിഷേധിച്ചു.
ഈ പ്രദേശത്ത് സംരക്ഷണഭിത്തി തകര്‍ന്നിട്ട് വര്‍ഷങ്ങളായി. സംരക്ഷണഭിത്തിയുടെ അഭാവം മൂലം ഈ പ്രദേശങ്ങളില്‍ അപകടങ്ങള്‍ പതിവാകുകയാണ്. നിരവധി പേരാണ് ഇവിടെയുണ്ടായ അപകടങ്ങളില്‍ മരണമടഞ്ഞത്.നിരവധി തവണ ഈ വിഷയം ദേശീയ പാത അധികൃതരുടെ ശ്രദ്ധയില്‍പ്പെടുത്തിയിട്ടും യാതൊരു നടപടിയും സ്വീകരിക്കുന്നില്ലെന്ന ആക്ഷേപവും ശക്തമാണ്.
അന്‍വര്‍ സാദത്ത് എം.എല്‍.എ പ്രതിഷേധ സമരം ഉല്‍ഘാടനം ചെയ്തു. മണ്ഡലം പ്രസിഡന്റ് സി.വൈ.ശാബോര്‍ അദ്ധ്യക്ഷനായിരുന്നു.മുന്‍ എം.എന്‍.എ എം.എ.ചന്ദ്രശേഖരന്‍, ബ്ലോക്ക് പ്രസിഡന്റ് ദിലീപ് കപ്രശ്ശേരി, ഡി.സി.സി സെക്രട്ടറി എം.ജെ.ജോമി, പി.ബി.സുനീര്‍, പി.വൈ. വര്‍ഗ്ഗീസ്, പി.ഒ.പൗലോസ്, പി.ജെ.ജോയി, ലിസി ജോര്‍ജ്, രാജേഷ് മടത്തിമൂല, ഷിബു മൂലന്‍ തുടങ്ങിയവര്‍ സംസാരിച്ചു.