ഇംഫാല്‍: ഐ ലീഗില്‍ ഇന്നലെ നടന്ന ഐസ്വാള്‍ എഫ്.സി നെരോക്ക മത്സരം സമനിലയില്‍ കലാശിച്ചു. സമനില പിടിച്ചതോടെ ഐസ്വാള്‍ പട്ടികയില്‍ ഒന്‍പതാം സ്ഥാനത്തും നെരോക്ക പത്താം സ്ഥാനത്തും എത്തി. ഇരു ടീമുകള്‍ക്കും മികച്ച ഗോളവസരങ്ങള്‍ ലഭിച്ചെങ്കിലും പന്ത് ലക്ഷ്യത്തിലെത്തിക്കാനായില്ല.
രണ്ട് സീസണ്‍ മുമ്പ് സെക്കന്‍ഡ് ഡിവിഷനില്‍നിന്ന് ചാംപ്യന്‍മാരായിട്ടായിരുന്നു നെരോക്ക ഐ ലീഗിലേക്കെത്തിയത്. ആദ്യ സീസണില്‍ തന്നെ നെരോക്ക മികച്ച പ്രകടനം പുറത്തെടുത്തിരുന്നു. എന്നാല്‍ നെരോക്കയുടെ രണ്ടാം സീസണില്‍ അത്ര മികച്ച തുടക്കമല്ല ടീമിന് ലഭിച്ചിട്ടുള്ളത്. ഇതുവരെ നടന്ന മൂന്ന് മത്സരത്തില്‍ രണ്ട് മത്സരത്തില്‍ സമനിലയും ഒരു മത്സരത്തില്‍ തോല്‍വിയുമാണ് നെരോക്കയുടെ സമ്പാദ്യം. മികച്ച താരനിരയുണ്ടായിട്ടും ടീമിന് ഫോമിലേക്ക് ഉയരാന്‍ സാധിക്കുന്നില്ലെന്ന് പരിശീലകന്‍ മാനുവര്‍ ഫ്രെയ്‌ലി മത്സര ശേഷം പറഞ്ഞു.
ടൂര്‍ണമെന്റിലേക്ക് തിരിച്ചുവരുന്നതിനുള്ള എല്ലാ ഒരുക്കവും നടത്തുമെന്നും ആദ്യ സീസണിലെക്കാള്‍ കൂടുതല്‍ മെച്ചപ്പെട്ട പ്രകടനം രണ്ടാം സീസണില്‍ പുറത്തെടുക്കാനാകുമെന്ന പ്രതീക്ഷയുണ്ടെന്നും അദ്ദേഹം കൂട്ടിച്ചേര്‍ത്തു. മൂന്ന് മത്സരം കളിച്ച ഐസ്വാള്‍ എഫ്.സിക്കും രണ്ട് സമനിലയും ഒരു തോല്‍വിയുമാണുള്ളത്. ശനിയാഴ്ച നടക്കുന്ന മത്സരത്തില്‍ ഐസ്വാള്‍ എഫ്.സി മിനര്‍വ പഞ്ചാബിനെ നേരിടും. ഞായറാഴ്ച വൈകിട്ട് കോഴിക്കോട് കോര്‍പറേഷന്‍ സ്റ്റേഡിയത്തില്‍ നടക്കുന്ന മത്സരത്തില്‍ ഗോകുലം എഫ്.സി ഷില്ലോങ് ലജോങ്ങിനെ നേരിടും.