സുല്‍ത്താന്‍ ബത്തേരി: ദേശീയപാത 766ലെ രാക്കുരുക്കിനെതിരേ കഴിഞ്ഞ ഒന്‍പത് ദിവസങ്ങളായി സുല്‍ത്താന്‍ ബത്തേരി സ്വതന്ത്ര മൈതാനിയില്‍ നിരാഹാരമിരിക്കുന്ന യുവാക്കളുടെ കൂട്ടായ്മക്ക് പിന്തുണയുമായി കെ.പി.സി.സി മുന്‍ പ്രസിഡന്റും എ.ഐ.സി.സി അംഗവുമായ വി.എം സുധീരനെത്തി.
ഇന്നലെ 11.30 ഓടെ സമരപ്പന്തലിലെത്തിയ സുധീരന്‍ നിരാഹാരമനുഷ്ഠിക്കുന്ന സമരക്കാരെ ഹാരമണിയിച്ചു.
സമരക്കാര്‍ ഉയര്‍ത്തുന്ന ആവശ്യങ്ങള്‍ ന്യായമാണ്. ഇക്കാരണത്താല്‍ ഇവരുടെ സമരത്തിനൊപ്പം തന്റെ മുഴുവന്‍ പിന്തുണയും ഉണ്ടാകുമെന്നും സുധീരന്‍ പറഞ്ഞു.
ഒരു ജനതയുടെ സഞ്ചാരസ്വാതന്ത്ര്യം ഉറപ്പ് വരുത്താനുള്ള സമരമാണ് നടക്കുന്നത്. നമുക്ക് പരിസ്ഥിതി സംരക്ഷിക്കണം. വന്യജീവി സംരക്ഷണവും ആവശ്യമാണ്. അതോടൊപ്പം പരമപ്രധാനമാണ് മനുഷ്യരുടെ സഞ്ചാരസ്വാതന്ത്ര്യം ഉറപ്പ് വരുത്തുകയെന്നത്. രാത്രിയാത്രാ നിരോധനം പത്തുവര്‍ഷമായും തുടരുകയാണ്.
ഇതിനിടെയാണ് പകല്‍കൂടി നിരോധിക്കാനുള്ള ശ്രമം നടക്കുന്നത്. ഇത് ജനങ്ങളെ ഒന്നാകെ സമരത്തിലേക്കിറക്കിയിരിക്കുകയാണെന്നും സുധീരന്‍ വ്യക്തമാക്കി.
സംഭവത്തില്‍ വിദഗ്ധാഭിപ്രായം ആരാഞ്ഞപ്പോള്‍ എല്ലാവരും പറയുന്നത് മേല്‍പ്പാലമാണ് പ്രായോഗികം എന്നാണ്. ഇത് പരിസ്ഥിതി സൗഹൃദമായിരിക്കണമെന്ന് മാത്രം.
കൊച്ചി മെട്രോ പോലും ഇത്തരത്തില്‍ ഒറ്റത്തൂണുകളിലാണ്. ഇത്തരത്തിലുള്ള കാര്യങ്ങള്‍ ഇവിടെയും ഫലപ്രദമായി നടപ്പിലാക്കണം- വി.എം സുധീരന്‍ അഭിപ്രായപ്പെട്ടു.