മലപ്പുറം: ജില്ലാ ടൂറിസം പ്രമോഷന്‍ കൗണ്‍സിലിന്റെ പീപ്പിള്‍സ് മലപ്പുറം എക്‌സ്‌പോ 10,11 തിയതികളില്‍ കോട്ടക്കുന്ന് ഡി.ടി.പിസി ഹാളില്‍ നടക്കും. ജില്ലയിലെ യുവ വനിതാ സംരംഭകരുടെ കൂട്ടായ്മയായ 'ദി അരോറ മാര്‍ക്കറ്റു'മായി സഹകരിച്ചാണ് പ്രദര്‍ശനം ഒരുക്കിയിരിക്കുന്നത്. പ്രദര്‍ശനത്തിന്റെ മേല്‍നോട്ടവും ഏകോപനവും സ്ത്രീകളാണ് നിര്‍വഹിക്കുന്നത്. പ്രദര്‍ശനത്തില്‍ 40ലധികം സ്റ്റാളുകള്‍ ഒരുക്കിയിട്ടുണ്ട്.
രാവിലെ പത്തുമുതല്‍ വൈകിട്ട് ഒന്‍പതുവരെ നടക്കുന്ന മേളയില്‍ പ്രവേശനം സൗജന്യമാണ്. പ്രദര്‍ശനത്തിന്റെ ഉദ്ഘാടനം പത്തിന് വൈകിട്ട് 4.30ന് നഗരസഭാ ചെയര്‍പേഴ്‌സന്‍ സി.എച്ച് ജമീല ടീച്ചര്‍ നിര്‍വഹിക്കും.
ജില്ലയുടെ ചരിത്രവും സംസ്‌കാരവും വിളിച്ചോതുന്ന രീതിയിലാണ് സ്റ്റാളുകള്‍ ഒരുക്കിയിട്ടുള്ളത്.
സംസ്ഥാനത്തിന്റെ വിവിധ ഭാഗങ്ങളില്‍ നിന്നുള്ള ഫാഷന്‍, ആര്‍ട്, ബുക്ക് തുടങ്ങിയ മേഖലയിലുള്ള നവ സംരംഭകര്‍ മേളയിലെത്തും.
ജില്ലയുടെ തനത് രുചി വൈവിധ്യങ്ങള്‍ പരിചയപ്പെടുത്തുന്ന ഭക്ഷ്യമേളയും മൈലാഞ്ചിയിടല്‍ ഉള്‍പ്പെടെയുള്ള വിവിധ മത്സരങ്ങളും പ്രദര്‍ശനത്തിലുണ്ടാകും.
തുടര്‍ന്നുള്ള ദിവസങ്ങളില്‍ വൈകിട്ട് വിവിധ കലാ സാംസ്‌കാരിക പരിപാടികളും 11ന് ഖവ്വാലി സംഗീത പരിപാടിയും അരങ്ങേറും.