കായംകുളം : ട്രെയിനില്‍ മോഷണം നടത്തുന്ന ഇതരസംസ്ഥാന യുവാവിനെ ആര്‍.പി.എഫ് പിടികൂടി. വെസ്റ്റ് ബംഗാള്‍ സ്വദേശി സഹിമത്ത് (23) നെയാണ് പിടിക്കൂടിയത്. കഴിഞ്ഞ മൂന്നിന് രാത്രി തിരുവനന്തപുരം നിസാമുദ്ദീന്‍ എക്‌സ്പ്രസ് ട്രെയിനില്‍ യാത്ര ചെയ്ത കോഴിക്കോട് സ്വദേശി നേഹ എന്ന യാത്രക്കാരിയുടെ 15000 രൂപ വിലവരുന്ന മൊബൈല്‍ഫോണ്‍, ചാര്‍ജര്‍, 5,000 രൂപ വിലവരുന്ന വാച്ച് എ.ടി.എം,ആധാര്‍,പാന്‍ എന്നീ കാഡുകള്‍ ഇവ അടങ്ങിയ ബാഗാണ് ഇയാള്‍ മോഷ്ടിച്ചത്. കായംകുളം റെയില്‍വേ സ്‌റ്റേഷനില്‍ രാത്രി രണ്ടരയോടെ എത്തിയ ട്രെയിനില്‍നിന്നും യാത്രക്കാരിയുടെ ബാഗ് മോഷ്ടിച്ച് ട്രെയിന്‍ സ്‌റ്റേഷനില്‍നിന്ന് നീങ്ങിതുടങ്ങിയപ്പോള്‍ പുറത്തേക്ക് ചാടി രക്ഷപ്പെട്ടിരുന്നു. യാത്രക്കാരി ഉടന്‍തന്നെ ചങ്ങല വലിച്ച് ട്രെയിന്‍ നിര്‍ത്തി വിവരം പറഞ്ഞതോടെ ഡ്യൂട്ടിയിലുണ്ടായിരുന്ന ആര്‍.പി.എഫും റെയില്‍വേ പൊലിസും സ്‌റ്റേഷന്‍പരിസരത്ത് അന്വേഷണം നടത്തിയെങ്കിലും ആരെയും കണ്ടെത്താനായില്ല.
കഴിഞ്ഞ കുറെദിവസങ്ങളായി റെയില്‍വേ സ്റ്റേഷന്‍ കേന്ദ്രീകരിച്ച് ആര്‍.പി.എഫ് ക്രൈംസ്‌ക്വാഡ് മഫ്തിയില്‍ നിരീക്ഷണം നടത്തുന്നുണ്ടായിരുന്നു. കഴിഞ്ഞ ദിവസം രാവിലെ പ്‌ളാറ്റ്‌ഫോമിന് സമീപമുളള കുറ്റിക്കാട്ടില്‍നിന്ന് ഒരു യുവാവ് ബാഗുമായി നടന്നുവരുന്നത് കണ്ട് സംശയം തോന്നിയ സ്‌ക്വാഡിലെ ഉദ്യോഗസ്ഥര്‍ ഇയാളെ ചോദ്യം ചെയ്തപ്പോള്‍ നാട്ടിലേക്ക് പോകാനെത്തിയതാണെന്ന് പറഞ്ഞെങ്കിലും അയാളുടെ ബാഗ് പരിശോധിച്ചപ്പോള്‍ യാത്രക്കാരിയുടെ മോഷണംപോയ വസ്തുക്കള്‍ ബാഗില്‍ കണ്ടെത്തി.
തുടര്‍ന്ന് ഇയാളെ കോട്ടയം റെയില്‍വേ പൊലിസിന് കൈമാറി. ആര്‍.പി.എഫ് ക്രൈം സ്‌ക്വാഡിലെ സബ്ഇന്‍സ്‌പെക്ടര്‍ ജിപിന്‍, കോണ്‍സ്റ്റബിള്‍മാരായ മനോജ്കുമാര്‍,സുരേഷ്‌കുമാര്‍ എന്നിവരുടെ സംഘമാണ് ഇയാളെ പിടികൂടിയത്.