തളിപ്പറമ്പ്: ഏഴാംമൈലിലെ സൂപ്പര്‍ മാര്‍ക്കറ്റിലും മെയിന്‍ റോഡിലെ കടകളിലും കവര്‍ച്ച നടത്തിയ കേസില്‍ റിമാന്‍ഡിലായ തൊരപ്പന്‍ സന്തോഷിന്റെ രണ്ടു സഹായികളെ തളിപ്പറമ്പ് പൊലിസ് കസ്റ്റഡിയില്‍ വാങ്ങി. തമിഴ്‌നാട് സ്വദേശി വിജയ് രാജ്(22), ഇടുക്കി സ്വദേശി പൊന്നച്ചന്‍(52) എന്നിവരോടൊപ്പം സന്തോഷിനെ കഴിഞ്ഞ 21ന് രാത്രി ശ്രീകണ്ഠപുരത്തെ ബിയര്‍ പാര്‍ലറില്‍ വച്ചായിരുന്നു പിടികൂടിയത്. ഇവരെ കവര്‍ച്ച നടന്ന സ്ഥലങ്ങളില്‍ കൊണ്ടുപോയി തെളിവെടുത്തു. കവര്‍ച്ചകളില്‍ സന്തോഷിനൊപ്പം തങ്ങളും പങ്കാളികളായിരുന്നു എന്ന് ചോദ്യംചെയ്യലില്‍ പ്രതികള്‍ സമ്മതിച്ചതായി പൊലിസ് പറഞ്ഞു. സന്തോഷ് ഇപ്പോള്‍ മറ്റൊരു കവര്‍ച്ചാ കേസില്‍ പ്രതിയായി മാനന്തവാടി പൊലിസ് കസ്റ്റഡിയിലാണ്.