മഞ്ചേശ്വരം: പോക്‌സോ കേസില്‍ പ്രതിയായ യുവാവിനെ വിമാനത്താവളത്തില്‍ വച്ച് പിടികൂടി. ബങ്കര മഞ്ചേശ്വരം കടപ്പുറത്തെ അല്‍ത്താഫിനെ(28)യാണ് മഞ്ചേശ്വരം എസ്.ഐ ഷാജിയും സംഘവും അറസ്റ്റ് ചെയ്തത്. ഇക്കഴിഞ്ഞ സെപ്റ്റംബറിലാണ് അല്‍ത്താഫിനെതിരേ 13 കാരിയായ പെണ്‍കുട്ടിയുടെ മൊഴിയുടെ അടിസ്ഥാനത്തില്‍ മഞ്ചേശ്വരം പൊലിസ് കേസെടുത്തത്.
വിദ്യാര്‍ഥിനിയെ പലതവണ പീഡിപ്പിച്ച ശേഷം ഗള്‍ഫിലേക്കു കടന്ന പ്രതിയെ നാട്ടിലേക്കു തിരിച്ചു വരുന്നതിനിടെയാണ് വിമാനത്താവളത്തില്‍ വച്ച് ഇയാളെ പിടികൂടിയത്.
സംഭവത്തില്‍ കേസെടുത്തതിനെ തുടര്‍ന്നാണ് അല്‍ത്താഫ് ഗള്‍ഫിലേക്ക് കടന്നത്. ഇതേ തുടര്‍ന്ന് അല്‍ത്താഫിനെതിരേ പൊലിസ് ലുക്കൗട്ട് നോട്ടീസ് പുറത്തിറക്കിയിരുന്നു. ഇക്കഴിഞ്ഞ ദിവസം മംഗളൂരു വിമാനത്താവളത്തില്‍ വന്നിറങ്ങിയ അല്‍ത്താഫിനെ എമിഗ്രേഷന്‍ വിഭാഗം തടഞ്ഞു വെക്കുകയും മഞ്ചേശ്വരം പൊലിസിനു വിവരം കൈമാറുകയുമായിരുന്നു. തുടര്‍ന്ന് പൊലിസ് വിമാനത്താവളത്തിലെത്തി ഇയാളെ അറസ്റ്റു ചെയ്യുകയായിരുന്നു.