സ്വന്തം ലേഖകന്‍
തിരുവനന്തപുരം: നിശ്ചയദാര്‍ഢ്യത്തിന്റെയും കഠിനാധ്വാനത്തിന്റെയും കഥ പറയാന്‍ പ്രാഞ്ജല്‍ പാട്ടീല്‍ ഇനി തിരുവനന്തപുരത്ത്. രാജ്യത്തെ ആദ്യ കാഴ്ച പരിമിതിയുള്ള വനിതാ ഐ.എ.എസ് ഉദ്യോഗസ്ഥയായ പ്രാഞ്ജല്‍ പാട്ടീല്‍ ഇന്ന് തിരുവനന്തപുരത്ത് സബ്കലക്ടറായി ചുമതലയേല്‍ക്കും. നേരത്തെ എറണാകുളത്ത് അസി. കലക്ടറായി (ട്രെയിനി) പ്രവര്‍ത്തിച്ചിരുന്ന പ്രാഞ്ജല്‍ പരിശീലനശേഷം മാസങ്ങള്‍ക്കു മുന്‍പ് മുസ്സൂറിയിലെ ലാല്‍ ബഹദൂര്‍ശാസ്ത്രി നാഷനല്‍ അക്കാദമി ഓഫ് അഡ്മിനിസ്‌ട്രേഷനിലേക്ക് (എല്‍.ബി.എസ്.എന്‍.എ.എ) മടങ്ങിയിരുന്നു.
ആറാം വയസിലാണ് പരീക്ഷണത്തിന്റെ കരിനിഴല്‍ വീഴ്ത്തി കാഴ്ച ശക്തി നഷ്ടമായിത്തുടങ്ങിയത്. നിശ്ചയദാര്‍ഢ്യത്തിന്റെ കരുത്തില്‍ ജെ.എന്‍.യുവില്‍നിന്ന് ഇന്റര്‍നാഷനല്‍ റിലേഷന്‍സില്‍ ബിരുദാനന്തര ബിരുദം പൂര്‍ത്തിയാക്കിയ പ്രാഞ്ജല്‍ എം. ഫില്ലിനായി അപേക്ഷ നല്‍കി കാത്തിരിക്കുമ്പോഴാണ് സിവില്‍ സര്‍വിസിനായി ശ്രമം തുടങ്ങിയത്. 2016ലെ ആദ്യശ്രമത്തില്‍ 773ാംറാങ്ക് നേടി. ഇന്ത്യന്‍ റെയില്‍വേ അക്കൗണ്ട്‌സ് സര്‍വിസ് വിഭാഗത്തില്‍ അവസരം ലഭിച്ചെങ്കിലും കാഴ്ചയില്ലെന്ന കാരണം പറഞ്ഞ് റെയില്‍വേ തഴഞ്ഞു. പിന്തിരിയാതെ നടത്തിയ അടുത്ത ശ്രമത്തില്‍ 124ാം റാങ്കോടെ പ്രാഞ്ജല്‍ രാജ്യത്തിന്റെ ഭരണ സര്‍വിസിലേക്ക് ചുവടുവച്ചു. സബ് കലക്ടറും തിരുവനന്തപുരം ആര്‍.ഡി.ഒയുമായി ഇന്ന് ചുമതലയേല്‍ക്കുന്ന പ്രാഞ്ജലിനെ ആര്‍.ഡി.ഒ ഓഫിസിലെ സീനിയര്‍ സൂപ്രണ്ടിന്റെ നേതൃത്വത്തില്‍ സ്വീകരിക്കും.