വാടാനപ്പള്ളി : ബൈക്കുകള്‍ മോഷ്ടിച്ച് പല ഭാഗങ്ങളാക്കി വ്യാജ നമ്പര്‍ പതിച്ച് വില്‍പ്പന നടത്തുന്ന സംഘത്തിലെ പ്രധാനിയെ വലപ്പാട് പൊലിസ് അറസ്റ്റ് ചെയ്തു. മതിലകം പൊന്നംപടി കോളനി വട്ടപ്പറമ്പില്‍ അലി അഷ്‌കര്‍ (19)ആണ് അറസ്റ്റിലായത്.ഇയാള്‍ മോഷ്ടിച്ച പള്‍സര്‍ ബൈക്കും പൊലിസ് പിടികൂടി.
മോഷ്ടിച്ച വാഹനങ്ങള്‍ പല ഭാഗങ്ങളാക്കി പൂര്‍ണമായും തകര്‍ന്ന് ഇന്‍ഷുറന്‍സ് കമ്പനി തള്ളിയ വാഹനങ്ങളുടെ എഞ്ചിന്‍ നമ്പറും ചെയ്‌സിസ് നമ്പറും മോഷ്ടിച്ച വാഹനങ്ങളില്‍ പതിപ്പിച്ച് വില്‍പ്പന നടത്തുന്ന സംഘത്തില്‍ ഉള്‍പ്പെട്ടയാളാണ് അലി അഷ്‌കറെന്ന് പൊലീസ് പറഞ്ഞു.വിവിധ വര്‍ക് ഷോപ്പുകളില്‍ ജോലി ചെയ്തിട്ടുള്ള ഇയാള്‍ താക്കോല്‍ ഇല്ലാതെ വാഹനം തുറക്കാന്‍ പഠിച്ചു.17വയസ്സുള്ളപ്പോള്‍ വടക്കേക്കര ബൈക്ക് മോഷ്ടിച്ച് പിടിയിലായിട്ടുണ്ട്.വലപ്പാട് ഹൈസ്‌കൂള്‍ ഗ്രൗണ്ടിനു സമീപം താക്കോല്‍ ഇല്ലാതെ ബൈക്കിനരികെ നില്‍ക്കുന്നതുകണ്ട് പൊലിസ് ചോദ്യം ചെയ്തപ്പോള്‍ മാള അപ്പോളൊ ടയേഴ്‌സ് ഉടമയുടെ മോഷ്ടിച്ച ബൈക്കാണെന്നറിയുകയും അറസ്റ്റ് ചെയ്യുകയുമായിരുന്നു.
സംഘത്തിലെ മറ്റുള്ളവര്‍ക്കുവേണ്ടി അന്വേഷണം തുടരുകയാണെന്ന് പോലീസ് പറഞ്ഞു. വലപ്പാട് സി.ഐ: സി.ആര്‍.സന്തോഷ്, എസ്.ഐ: ഇ.ആര്‍.ബൈജു, പൊലിസുകാരായ ടി.ആര്‍.ഷൈന്‍, കെ.രാജേഷ്, പി.ഡി.ദിബിഷ എന്നിവരടങ്ങിയ സംഘമാണു പ്രതിയെ പിടികൂടിയത്.