കുന്നംകുളം: കുടുംബത്തെ ആത്മഹത്യാമുനമ്പില്‍ നിര്‍ത്തിയുള്ള ജപ്തി നടപടി പൊതുജനങ്ങളുടെ ഇടപെടല്‍ മൂലം തടസപെട്ടു.
എട്ടുകോടിയിലേറെ വിലവരുന്ന നഗരഹൃദയത്തിലെ വീടും സ്ഥലവും ചതിയിലൂടെ നഷ്ടപെടുന്നത് തടയാനാകാത്തതിനാല്‍ മൂന്നു മക്കളും അമ്മയും ആത്മഹത്യക്കു ശ്രമിച്ചതോടെയാണ് ജപ്തി നടപടികള്‍ താല്‍ക്കാലികമായി നിര്‍ത്തിവെച്ചത്.
കുന്നംകുളം തൃശൂര്‍ റോഡില്‍ ബഥനി ഇംഗ്ലീഷ് സ്‌കൂളിനു മുന്നില്‍ താമസിക്കുന്ന മധുരഞ്ചേരി ബിന്നിയുടെ പുരയിടമാണ് കോടതി ഉത്തരവിനെ തുടര്‍ന്ന് ചെന്നൈയിലെ സ്വകാര്യ കമ്പനി അഡ്വ. കമ്മീഷന്‍ മുഖേനെ ജപ്തി ചെയ്യാനെത്തിയത്. പത്തു വര്‍ഷം മുന്‍പ് ബിന്നിക്ക്് എര്‍ണാംകുളം സ്വദേശി ലോണെടുത്തു നല്‍കാമെന്നേറ്റ് വീടിന്റെ മുക്തിആര്‍ വാങ്ങുകയും രണ്ടു ലക്ഷം രൂപ നല്‍കുകയും ചെയ്തു. പിന്നീട് ഇയാള്‍ അന്‍പത് ലക്ഷം രൂപക്ക് എസ്.ബി.ഐ എറണാംകുളം ശാഖയില്‍ സുനിത എന്ന സ്ത്രീയുടെ പേരില്‍ ലോണെടുത്തു. ഇതു ബിന്നി അറിഞ്ഞിരുന്നില്ല. തിരിച്ചടവ് മുടങ്ങിയതോടെ ബാങ്ക് സ്ഥലം ചെന്നൈയിലുള്ള സ്വകാര്യ കണ്‍സ്ട്രക്ഷന്‍ കമ്പനിക്ക് വിറ്റു എന്നാണ് രേഖകള്‍. എന്നാല്‍ നിയമ നടപടികളുമായി മുന്നോട്ടു പോകാന്‍ സാമ്പത്തിക സ്ഥിതി ഇല്ലാതിരുന്നതോടെ കേസില്‍ കമ്പനി വിജയിക്കുകയായിരുന്നുവെന്ന് ഇവര്‍ പറയുന്നു. ഗുണ്ടകളുള്‍പടേ ഇവരെ ഒഴിവാക്കാന്‍ പലരും വീട്ടിലെത്തുന്നതു പതിവായതോടെ ഇവരെ ഭയന്ന് ഒന്‍പതോളം നായകളെ വീട്ടില്‍ വളര്‍ത്തി. നായകളെ പിടികൂടാനുള്ള വിദ്ഗധരും വാതിലുകള്‍ തകര്‍ക്കാനായി ജനറേറ്ററും കട്ടറും വിദ്ഗ്ധ തൊഴിലാളികളുമായി പൊലിസ് സംരക്ഷണയിലാണ് സംഘം എത്തിയത്. ഈ സമയം ബിന്നി വീട്ടിലുണ്ടായിരുന്നില്ല. മുന്‍ വശത്തെ രണ്ടു വാതിലുകള്‍ തകര്‍ത്തതോടെ സില്ലിയും മക്കളും ദേഹത്ത് മണ്ണണ്ണ ഒഴിച്ചു ആത്മഹത്യാ ഭീഷണി മുഴക്കി. ഇതിനിടെ പൊലിസ് ആംബുലന്‍സും ഫയര്‍ഫോഴ്‌സിനേയും വിളിച്ചുവരുത്തിയിരുന്നു. സംഭവമറിഞ്ഞെത്തിയ നാട്ടുകാര്‍ ക്ഷുഭിതരാവുകയും ജപ്തിക്കെത്തിയവരുമായി വാക്കു തര്‍ക്കമുണ്ടാവുകയും ചെയ്തു. പലപ്പോഴായി ഇത്തരത്തില്‍ ജപ്തി നടപടികളുമായി ബാങ്കുകാര്‍ എത്തിയിട്ടുണ്ടെങ്കിലും പൊതു ജനപ്രതിഷേധത്തെ തുടര്‍ന്ന് തിരിച്ചുപോകാറാണ് പതിവ്. നാട്ടുകാരുടെ സാന്നിധ്യത്തില്‍ നടത്തിയ ചര്‍ച്ചയില്‍ ജപ്തിക്ക് സ്റ്റേ വാങ്ങുന്നതിനായുള്ള സമയം അനുവദിക്കാമെന്ന് അഡ്വ. കമ്മിഷന്‍ സമ്മതിച്ചു.