വാണിമേല്‍ (കോഴിക്കോട്): വാണിമേല്‍ പഞ്ചായത്തിലെ മാമ്പിലാക്കൂല്‍ അച്ചാര്‍ കണ്ടി കുഞ്ഞബ്ദുല്ലയുടെ മകന്‍ സമീറും മുളിവയല്‍ മഹല്ലിലെ ഉണ്ണിയോട് കുഞ്ഞബ്ദുല്ല ഹാജിയുടെ മകള്‍ ഫാത്തിമ ജുവൈരിയയും തമ്മില്‍ നിലനിന്നിരുന്ന വിവാഹമോചന സംബന്ധമായ പ്രശ്‌നങ്ങള്‍ക്ക് പരിഹാരമായി. രണ്ടു മഹല്ല് കമ്മിറ്റി പ്രതിനിധികളും നടത്തിയ മധ്യസ്ഥ ചര്‍ച്ചയിലാണ് പ്രശ്‌നം ഒത്തുതീര്‍പ്പിലെത്തിയത്.

ഇതിന്റെ ഭാഗമായി നടന്നുവന്നിരുന്ന സമരപരിപാടികള്‍ അവസാനിപ്പിക്കാനും കോടതിയിലും പൊലിസ് സ്റ്റേഷനിലും ഉള്ള എല്ലാ കേസുകളും പിന്‍വലിക്കാനും ധാരണയായി. പ്രശ്‌നം പരിഹരിക്കാന്‍ സഹകരിച്ച എല്ലാവര്‍ക്കും ഇരു മഹല്ല് കമ്മിറ്റികളും നന്ദി രേഖപ്പെടുത്തി. മധ്യസ്ഥ ശ്രമത്തിന് മഹല്ല് കമ്മിറ്റികളുടെ പ്രതിനിധികളായ കുന്നുമ്മല്‍ അബ്ദുല്ലഹാജി, പി.പി സൂപ്പി മാസ്റ്റര്‍, മുഹിയുദ്ദീന്‍ തോട്ടത്തില്‍, യു.കെ അഷ്‌റഫ് മുസ്‌ലിം ലീഗ് നേതാക്കളായ അഷ്‌റഫ് കൊറ്റല, എം.കെ മജീദ്,  തുടങ്ങിയവര്‍ നേതൃത്വം നല്‍കി.