ന്യൂഡല്‍ഹി: ആസ്‌ത്രേലിയന്‍ പര്യടനത്തിനായി ഇന്ത്യന്‍ ക്രിക്കറ്റ് ടീം പുറപ്പെട്ടു. ഇന്നലെയാണ് ഇന്ത്യന്‍ സംഘം ആസ്‌ത്രേലിയയിലേക്ക് തിരിച്ചത്. മൂന്ന് ടി20, നാല് ടെസ്റ്റ്, മൂന്ന് ഏകദിനം എന്നിവയായിരിക്കും ആസ്‌ത്രേലിയയില്‍ നടക്കുക. ഈ മാസം 21ന് ടി20 മത്സരങ്ങളാണ് ആദ്യം നടക്കുന്നത്.
ഇതുവരെ ആസ്‌ത്രേലിയന്‍ മണ്ണില്‍ ടെസ്റ്റില്‍ ജയിക്കാനാവാത്ത ഇന്ത്യ ഇത്തവണ ജയംകൊണ്ടേ മടങ്ങൂ എന്ന ഉറച്ച വിശ്വാസത്തിലാണുള്ളത്. വെസ്റ്റിന്‍ഡീസുമായുള്ള പരമ്പരയില്‍ മികച്ച നേട്ടം സ്വന്തമാക്കിയാണ് ഇന്ത്യ ആസ്‌ത്രേലിയയുമായി കൊമ്പുകോര്‍ക്കാന്‍ പുറപ്പെടുന്നത്.
ആസ്‌ത്രേലിയയുടെ സൂപ്പര്‍താരങ്ങളായ ഡേവിഡ് വാര്‍ണര്‍, സ്റ്റീവ് സ്മിത്ത് എന്നിവരുടെ അഭാവത്തില്‍ ജയംകൈപ്പിടിയിലൊതുക്കാനാകുമെന്ന വിശ്വാസത്തിലാണ് ടീം ഇന്ത്യ.
ആസ്‌ത്രേലിയയിലേക്ക് പുറപ്പെട്ട ടീമില്‍ കാര്യമായ മാറ്റങ്ങളില്ലാതെയായിരിക്കും അടുത്ത വര്‍ഷം നടക്കുന്ന ലോകകപ്പില്‍ ഇന്ത്യ കളിക്കുക. ഇതിനുവേണ്ടിയുള്ള മുന്നൊരുക്കത്തിന്റെ ഭാഗം കൂടിയാണ് ഇന്ത്യന്‍ സംഘത്തിന്റെ ആസ്‌ത്രേലിയന്‍ ടൂര്‍. ഇനി ടീമില്‍ കൂട്ടിച്ചേര്‍ക്കലുകളോ ഒഴിവാക്കലുകളോ ഉണ്ടാകില്ലെന്ന് പരിശീലകന്‍ രവിശാസ്ത്രിയും അടിവരയിട്ട് പറഞ്ഞു.
ഏത് മത്സരത്തിലും ജയിക്കാന്‍ മതിയായ ടീം ഇപ്പോള്‍ ഇന്ത്യക്കുണ്ടെന്നും ഈ ടീമിനെ നിലനിര്‍ത്തിയാല്‍ ഇന്ത്യക്ക് മികച്ച മുന്നേറ്റങ്ങള്‍ നടത്താനാകുമെന്നും രവിശാസ്ത്രി പറഞ്ഞു.