മാണ്ഡ്യ: ജാതി നോക്കാതെ വിവാഹം കഴിച്ചതിന്റെ പേരില്‍ തമിഴ്‌നാട് സ്വദേശികളായ ദമ്പതികളെ കൈകാലുകള്‍ ബന്ധിച്ച് പുഴയിലെറിഞ്ഞു കൊലപ്പെടുത്തി. അഞ്ചു ദിവസം മുന്‍പു നടന്ന സംഭവം ഇന്നലെ മൃതദേഹം കണ്ടെത്തിയതോടെയാണ് പുറംലോകമറിഞ്ഞത്.
തമിഴ്‌നാട് സ്വദേശികളായ നന്ദിഷ് (26), സ്വാതി (19) എന്നിവരുടെ മൃതദേഹങ്ങളാണ് കര്‍ണാടകയിലെ ശിവസമുദ്രയ്ക്കടുത്തു കാവേരി നദിയില്‍നിന്നു കണ്ടെടുത്തത്. കൊലയ്ക്കു പിന്നില്‍ യുവതിയുടെ പിതാവാണെന്നും ദുരഭിമാനക്കൊലയാണെന്നും മാണ്ഡ്യ പൊലിസ് പറഞ്ഞു. ഭീഷണിയെ തുടര്‍ന്നു ദമ്പതികള്‍ കര്‍ണാടകയിലേക്കു കടന്ന് ഹൊസൂരില്‍ ഒളിച്ചുതാമസിക്കുകയായിരുന്നു .
പിതാവും ബന്ധുക്കളും ഭീഷണിപ്പെടുത്തിയതിനെ തുടര്‍ന്നു നേരത്തെ ദമ്പതികള്‍ പൊലിസില്‍ പരാതി നല്‍കിയിരുന്നു. തുടര്‍ന്നാണ് ഇവരെ യുവതിയുടെ പിതാവ് പിടികൂടി കൈകാലുകള്‍ ബന്ധിച്ച് പുഴയിലെറിഞ്ഞത്.