കാഞ്ഞങ്ങാട്:   മോഷണക്കേസില്‍ കണ്ണൂര്‍ ടൗണ്‍ പൊലിസിന്റെ പിടിയിലായ ഇരിട്ടി സ്വദേശി സജേഷിനെ ഹൊസ്ദുര്‍ഗ് പൊലിസ് കസ്റ്റഡിയില്‍ എടുത്തു. കാഞ്ഞങ്ങാട് പരിസരത്തെ നാലോളം വീടുകളില്‍ നടന്ന മോഷണ കേസുമായി ബന്ധപ്പെട്ടാണ് ഇയാളെ പൊലിസ് കസ്റ്റഡിയില്‍ എടുത്തത്.
ഇക്കഴിഞ്ഞ ഏപ്രില്‍ 20നു രാത്രി ഞാണിക്കടവിലെ ബി.എ മുഹമ്മദ് കുഞ്ഞിയുടെ വീട്ടില്‍ നിന്നു നാലരപ്പവന്റെ സ്വര്‍ണവും റിട്ട. ഡിവൈ.എസ്.പി കെ.പി പ്രഭാകരന്റെ വീട്ടില്‍ നിന്നു മൂന്നരപ്പവന്റെ സ്വര്‍ണവും കവര്‍ച്ച ചെയ്തത് ഇയാളാണെന്നു കണ്ടെത്തിയതിനെ തുടര്‍ന്നാണ് ഇയാളെ കസ്റ്റഡിയില്‍ വാങ്ങി പൊലിസ് കാഞ്ഞങ്ങാട്ടേക്കു കൊണ്ടുവന്നത്. ഇതിനു പുറമേ കുറുന്തൂരിലെ അനീഷിന്റെ വീടിന്റെ മുന്നില്‍ നിര്‍ത്തിയിട്ടിരുന്ന ബൈക്കും അനന്തംപള്ളയിലെ കുഞ്ഞിക്കണ്ണന്റെ വീട്ടില്‍ നിന്നു സ്വര്‍ണവും കവര്‍ച്ച ചെയ്തതു താനാണെന്നു കണ്ണൂര്‍ പൊലിസിന്റെ  ചോദ്യം ചെയ്യലില്‍  സജേഷ് സമ്മതിച്ചിരുന്നു. ഇതേ തുടര്‍ന്നാണു ഹൊസ്ദുര്‍ഗ് പൊലിസ് ഇയാളെ കസ്റ്റഡിയില്‍ വാങ്ങിയത്.