ശ്രീനഗര്‍: ജമ്മു കശ്മിരില്‍ സി.ആര്‍.പി.എഫിനുനേരെ വീണ്ടും ഭീകരാക്രമണം. ഇന്നലെ വൈകീട്ട് ഏഴോടെ ശ്രീനഗറിലെ കരണ്‍ നഗര്‍ മേഖലയിലാണ് സി.ആര്‍.പി.എഫിനു നേരെ ഭീകരര്‍ ഗ്രനേഡ് ആക്രമണം നടത്തിയത്.
ആക്രമണത്തില്‍ ആറ് ജവാന്‍മാര്‍ക്ക് പരുക്കേറ്റിട്ടുണ്ട്. ഇവരെ ഉടന്‍ തന്നെ സൈനിക ആശുപത്രിയിലേക്ക് മാറ്റിയിട്ടുണ്ട്. കരണ്‍നഗറിലെ സുരക്ഷാ ജോലിക്ക് നിയോഗിച്ച 144ാം ബറ്റാലിയനിലെ അംഗങ്ങള്‍ക്കുനേരെയാണ് ആക്രമണമുണ്ടായത്. സംഭവത്തില്‍ സുരക്ഷാ സൈന്യം മേഖല വളഞ്ഞ് ഭീകരര്‍ക്കായി തിരച്ചില്‍ തുടങ്ങിയിട്ടുണ്ട്.
കഴിഞ്ഞ ദിവസങ്ങളിലായി ഒട്ടേറെ ആക്രമണങ്ങളാണ് ശ്രീനഗറില്‍ ഉണ്ടായത്. ട്രക്ക് ഡ്രൈവര്‍ക്കുനേരെ ആക്രമണം ഉണ്ടായതുള്‍പ്പെടെയുള്ള സംഭവങ്ങള്‍ ശക്തമായിരിക്കുകയാണ്. ഷോപ്പിയാന്‍ ജില്ലയില്‍ വ്യത്യസ്ത ദിവസങ്ങളിലായി ട്രക്കുകള്‍ക്കുനേരെ നടന്ന ആക്രമണങ്ങളില്‍ നിരവധിപേരാണ് കൊല്ലപ്പെട്ടത്.