തിരുവനന്തപുരം: ആധാര്‍- പാന്‍ ബന്ധിപ്പിക്കല്‍ തിയതി ഒരുമാസമെങ്കിലും നീട്ടണമെന്ന് സംസ്ഥാന സര്‍ക്കാര്‍ കേന്ദ്രത്തോട് ആവശ്യപ്പെടും. അക്ഷയ കേന്ദ്രങ്ങളിലെ തിരക്കുകാരണം നിശ്ചിത സമയത്തിനകം ബന്ധിപ്പിക്കല്‍ പൂര്‍ത്തിയാക്കാനാവില്ലെന്നുകാണിച്ച് ഐ.ടി മിഷന്‍ സംസ്ഥാന സര്‍ക്കാരിനു കത്തുനല്‍കിയ സാഹചര്യത്തിലാണ് സമയം നീട്ടാന്‍ ആവശ്യപ്പെടുന്നത്.
കേന്ദ്ര ധന മന്ത്രാലയത്തിന്റെ നിര്‍ദേശമനുസരിച്ച് ഈ മാസം 30നുള്ളില്‍ ബന്ധിപ്പിക്കല്‍ പൂര്‍ത്തിയാക്കണം. ഇതിനായി സാധാരണക്കാര്‍ ആശ്രയിക്കുന്നത് അക്ഷയ കേന്ദ്രങ്ങളെയാണ്. അക്ഷയ കേന്ദ്രങ്ങളില്‍ ആളുകള്‍ കൂട്ടത്തോടെ എത്തുന്നതിനാല്‍ വലിയ തിരക്കാണ് അനുഭവപ്പെടുന്നത്. രേഖകളിലെ തെറ്റുകളും ചേര്‍ത്ത വിവരങ്ങളിലെ വ്യത്യാസങ്ങളും ബന്ധിപ്പിക്കല്‍ നടപടി സങ്കീര്‍ണമാക്കുകയും ചെയ്യുന്നു.
വ്യത്യാസമുള്ള വിവരങ്ങള്‍ തിരുത്താനും നിരവധി ആളുകള്‍ അക്ഷയ കേന്ദ്രങ്ങളിലെത്തുന്നുണ്ട്. ഈ വ്യത്യാസങ്ങള്‍ കാരണം വെബ്‌സൈറ്റ് വഴി ബന്ധിപ്പിക്കല്‍ നടപടികള്‍ പൂര്‍ത്തിയാക്കാനാവാത്ത അവസ്ഥയുമുണ്ട്. അതിനാല്‍ കാലാവധി നീട്ടാന്‍ കേന്ദ്രത്തോട് ആവശ്യപ്പെടണമെന്നാണ് ഐ.ടി മിഷന്‍ സര്‍ക്കാരിനു നല്‍കിയ കത്തിലുള്ളത്.
ആദായനികുതി റിട്ടേണ്‍ ഫയല്‍ ചെയ്യുന്ന വ്യക്തികള്‍ക്കെല്ലാം ആധാറും പാനും ബന്ധിപ്പിക്കുന്നത് കേന്ദ്ര സര്‍ക്കാര്‍ നിര്‍ബന്ധമാക്കിയിട്ടുണ്ട്.