വടകര: സ്വകാര്യ ബസ് തകര്‍ത്ത സംഭവത്തില്‍ പ്രതികളെ അറസ്റ്റ് ചെയ്യാത്തതില്‍ പ്രതിഷേധിച്ച് തൊളിലാളികള്‍ സമരത്തിലേക്ക്.
തീക്കുനി-വടകര റൂട്ടില്‍ സര്‍വിസ് നടത്തുന്ന പ്രകാശ് ബസാണ് കഴിഞ്ഞ മാസം 28ന് തകര്‍ത്തത്. സര്‍വിസ് കഴിഞ്ഞ് തീക്കുനി ടൗണില്‍ നിര്‍ത്തിയിട്ട ബസിന്റെ രണ്ടു ഭാഗത്തെയും ഗ്ലാസ് തകര്‍ക്കുകയും പെട്രോള്‍ ടാങ്കില്‍ പൂഴി നിറക്കുകയുമായിരുന്നു. എന്നാല്‍ ഇതുവരെ കേസില്‍ ആരെയും പിടികൂടാന്‍ കഴിഞ്ഞിട്ടില്ല.
പ്രതികളെ ഉടനെ അറസ്റ്റ് ചെയ്യുന്നില്ലെങ്കില്‍ ബസ് സര്‍വിസ് നിര്‍ത്തിവയ്ക്കുന്നതുള്‍പ്പെടെയുള്ള സമര പരിപാടികള്‍ക്ക് നേതൃത്വം നല്‍കാന്‍ ജില്ലാ ബസ് ആന്‍ഡ് എന്‍ജിനീയറിങ് വര്‍ക്കേഴ്‌സ് യൂനിയന്‍ (സി.ഐ.ടി.യു) വടകര ഏരിയാ കമ്മിറ്റി തീരുമാനിച്ചു. അഡ്വ. ഇ.കെ നാരായണന്‍ അധ്യക്ഷനായി. കെ.വി രാമചന്ദ്രന്‍, എ. സതീശന്‍, പി. പ്രമോദ് സംസാരിച്ചു.