എടപ്പാള്‍: ഭാരതപ്പുഴില്‍ മുതലയെ കണ്ടതായുള്ള അഭ്യൂഹം ജനങ്ങളില്‍ പരിഭ്രാന്തിയുണ്ടാക്കി. അധികൃതരെത്തി പരിശോധന നടത്തിയെങ്കിലും മുതലയെ കണ്ടെത്താനായില്ല. സംഭവത്തില്‍ പൊന്നാനി തഹസില്‍ദാര്‍ നിര്‍മല്‍കുമാര്‍ ജാഗ്രതാനിര്‍ദേശം നല്‍കി.
കഴിഞ്ഞദിവസം നരിപ്പറമ്പ് പമ്പ്ഹൗസിന് സമീപത്താണ് നാട്ടുകാരില്‍ ചിലര്‍ മുതലയെ കണ്ടത്. പൊന്നാനി തഹസില്‍ദാര്‍ വിവരമറിയിച്ചതനുസരിച്ച് നിലമ്പൂരിലുള്ള വനംവകുപ്പിലെ റാപിഡ് റെസ്‌പോണ്‍സ് ടീം ഭാരതപ്പുഴയില്‍ മുതലയെ കണ്ടതായി പറയുന്ന സ്ഥലത്ത് പരിശോധന നടത്തിയെങ്കിലും കണ്ടെത്താനായില്ല.
പുഴയില്‍ കുളിക്കാനിറങ്ങുന്നവരും മീന്‍പിടിക്കാനിറങ്ങുന്നവരും ജാഗ്രത പാലിക്കണമെന്ന് തഹസില്‍ദാര്‍ അറിയിച്ചിട്ടുണ്ട്.