വടകര: നിയമലംഘനം കണ്ടെത്തി നഗരസഭ ആരോഗ്യ വിഭാഗം നടപടി സ്വീകരിച്ചതിന്റെ പേരില്‍ പ്രതിഷേധിക്കുകയും ഹര്‍ത്താല്‍ നടത്തുകയും ചെയ്യുന്നതിലൂടെ വ്യാപാരികള്‍ ജനങ്ങളെ വെല്ലുവിളിക്കുകയാണെന്ന് നഗരസഭ ചെയര്‍മാന്‍ കെ ശ്രീധരന്‍ പ്രസ്താവിച്ചു. നഗരത്തിലെ ഹോട്ടലുകളില്‍ നഗരസഭ ആരോഗ്യ വിഭാഗം നടത്തിയ പരിശോധനയില്‍ നിയമലംഘനം നടത്തിയത് കണ്ടെത്തിയതിന്റെ അടിസ്ഥാനത്തിലാണ് ഹോട്ടല്‍, ലോഡ്ജ് എന്നിവ അടച്ചുപൂട്ടാന്‍ നഗരസഭ നോട്ടീസ് നല്‍കിയത്.
മാലിന്യം ഓടയിലേക്ക് ഒഴുക്കിവിടാന്‍ പാടില്ല എന്നത് കാലങ്ങളായി നഗരസഭ ആവശ്യപ്പെടുന്ന കാര്യമാണ്. മാത്രമല്ല മാസങ്ങള്‍ക്ക് മുമ്പും അല്ലാതെയും പല തവണയായി ഇത്തരത്തില്‍ മാലിന്യം ഒഴുക്കിവിടുന്ന സ്ഥാപനങ്ങള്‍ക്ക് നോട്ടീസ് നല്‍കുകയും മലിന ജലം ശുദ്ധീകരിക്കുന്ന ട്രീറ്റ്‌മെന്റ് പ്ലാന്റ് അടക്കമുള്ള സംവിധാനം ഏര്‍പ്പെടുത്താനും ആവശ്യപ്പെട്ടിരുന്നു. എന്നാല്‍ നഗരഭരണ കേന്ദ്രത്തിലെ അധികൃതരുടെ നിര്‍ദേശത്തോട് മുഖംതിരിച്ച സമീപനമാണ് കച്ചവടക്കാരുടെ ഭാഗത്ത് നിന്നും ഉണ്ടായത്.
ഇതിന്റെ അടിസ്ഥാനത്തിലാണ് സ്ഥാപനങ്ങള്‍ക്കെതിരെ നടപടി സ്വീകരിച്ചത്. എന്നിട്ടും വ്യാപാരികള്‍ ഒന്നടങ്കം സമരവുമായി രംഗത്ത് വരുന്നത് നിയമത്തോടുള്ള വെല്ലുവിളിയാണ് ചെയ്യുന്നത്. കുറച്ച് സ്ഥാപനങ്ങളുടെ മാലിന്യം കൊണ്ട് നൂറുകണക്കിന് കുടുംബങ്ങളാണ് ബുദ്ധിമുട്ടുന്നത്. ഇതുകൊണ്ട് തന്നെ വ്യാപാരികളുടെ നടപടികള്‍ ഏറെ ലജ്ജാകരമാണെന്നും ജനങ്ങളോടുള്ള വെല്ലുവിളിയായി ഇതിനെ കാണേണ്ടതുണ്ടെന്നും നഗരസഭ ചെയര്‍മാന്‍ വ്യക്തമാക്കി.