തിരുവനന്തപുരം: കാവാലം നാരായണപ്പണിക്കരുടെ ഓര്‍മപുതുക്കി കാവാലം മഹോത്സവത്തിന് തുടക്കമായി. ഇന്നലെ രാവിലെ 10ന് വൈലോപ്പിള്ളി സംസ്‌കൃതി ഭവനില്‍ പാലോട് രവി ഉദ്ഘാടനം ചെയ്തു.
ചലച്ചിത്ര നടനും ഫെസ്റ്റിവല്‍ ഡയരക്ടറുമായ നെടുമുടി വേണു മുഖ്യപ്രഭാഷണം നടത്തി. സോപാനം ഇന്‍സ്റ്റിറ്റ്യൂട്ട് ഓഫ് പെര്‍ഫോമിങ് ആര്‍ട്‌സ് ആന്‍ഡ് റിസര്‍ച്ച് സെന്ററിന്റെ ആഭിമുഖ്യത്തില്‍ 27 വരെ 'ചിരസ്മരണ' എന്ന പേരിലാണ് പരിപാടി നടക്കുന്നത്.
കാവാലത്തെക്കുറിച്ചുള്ള ഡോക്യുമെന്ററികളുടെ പ്രദര്‍ശനം, പ്രഥമ കാവാലം നാരായണപ്പണിക്കര്‍ നാട്യാചാര്യ പുരസ്‌കാര സമര്‍പ്പണം, പുസ്തകപ്രകാശനം, പാരമ്പര്യകലകളുടെ അവതരണം എന്നിവ ഇന്നും നാളെയുമായി നടക്കും.
ഭാരത് ഭവന്‍, വൈലോപ്പിള്ളി സംസ്‌കൃതി ഭവന്‍, പബ്ലിക്ക് റിലേഷന്‍സ് ഡിപ്പാര്‍ട്ട്‌മെന്റ്, ചലച്ചിത്ര അക്കാദമി, കേരള സംഗീത നാടക അക്കാദമി, ലളിതകലാ അക്കാദമി, ഫോക്ക്‌ലാന്‍ഡ് തൃക്കരിപ്പൂര്‍, കൂടിയാട്ടം കേന്ദ്ര എന്നിവയുടെ സഹകരണത്തോടെയാണ് പരിപാടി സംഘടിപ്പിക്കുന്നത്.