ജിദ്ദ: റിയാദിലെ ഷോപ്പിംഗ് മാളിന്റെ പാര്‍ക്കിംഗ് ഏരിയയില്‍ നിര്‍ത്തിയിട്ട മലയാളിയുടെ കാറിന്റെ ഗ്ലാസ് പൊട്ടിച്ച് പണവും രേഖകളുമടങ്ങിയ ബാഗുകള്‍ കവര്‍ന്നു. റിയാദ് അസീസിയ ട്രെയിന്‍മാളിന് സമീപമുള്ള പാര്‍ക്കിംഗ് ഏരിയയില്‍ കഴിഞ്ഞ ദിവസം രാത്രിയാണ് സംഭവം.

റിയാദ് കെ.എം.സി.സി കണ്ണൂര്‍ ജില്ലാ ജനറല്‍ സെക്രട്ടറി അന്‍വര്‍ വാരത്തിന്റെതായിരുന്നു കാര്‍. അന്‍വറും സുഹൃത്ത് ശഫീഖ് കൂടാളിയും ഒന്നിച്ച് മാളിലെത്തിയതായിരുന്നു. തിരിച്ചുവന്നപ്പോള്‍ കാറിന്റെ ഡ്രൈവിംഗ് സീറ്റിനടുത്തെ ഗ്ലാസ് പൊട്ടിച്ച നിലയില്‍ കണ്ടു. പരിശോധിച്ചപ്പോള്‍ കാറിന്റെ സീറ്റിലെയും ഡിക്കിയിലെയും മുഴുവന്‍ സാധനങ്ങളും വാരിവലിച്ചിട്ട നിലയിലായിരുന്നു. രണ്ടുപേരുടെയും ബാഗുകളും മോഷണം പോയിട്ടുണ്ട്. ചെക്ക് ലീഫ്, റസീറ്റ് ബുക്ക് അടക്കം പല രേഖകളും ബാഗിലുണ്ടായിരുന്നു. അസീസിയ പോലീസില്‍ പരാതി നല്‍കിയതിനെ തുടര്‍ന്ന് പോലിസെത്തി പരിശോധന നടത്തി.