ന്യൂഡല്‍ഹി: സൈന്യത്തിലെ മേലധികാരികള്‍ക്ക് സഹായത്തിനായി ആളെ നിയമിക്കുന്ന സഹായക്(ഓഡര്‍ലി) സംവിധാനം സൈന്യം ഭാഗികമായി ഇല്ലാതാക്കുന്നു. പകരം സാധാരണക്കാരെ ഇത്തരം ജോലികള്‍ക്കായി നിയമിക്കും. നിലവില്‍ സൈന്യത്തിലെ ഏതെങ്കിലും ജവാന്‍മാരെ ഇതിനായി നിയമിക്കുകയാണ് പതിവ്.
ഇങ്ങനെ നിയമിക്കുന്നവരെ വീട്ടുജോലി വരെ ചെയ്യിപ്പിക്കുന്നുവെന്ന പരാതിയെതുടര്‍ന്നാണിത്. സഹായക് സംവിധാനത്തിനെതിരേ സൈനികര്‍ക്കിടയില്‍ കടുത്ത എതിര്‍പ്പുണ്ട്. സമീപകാലത്ത് ജവാന്‍മാര്‍ ഇതിനെതിരേ പ്രതികരിക്കുന്ന വിഡിയോകള്‍ സോഷ്യല്‍ മീഡിയയിലും പ്രചരിച്ചിരുന്നു. സഹായക് എന്നതിലുപരി മേലുദ്യോഗസ്ഥര്‍ തങ്ങളെ അടിമപ്പണിയെടുപ്പിക്കുന്നുവെന്നായിരുന്നു പരാതി.
വിവിധ ഭാഗങ്ങളില്‍ നിന്നുള്ള അഭിപ്രായങ്ങള്‍ പരിഗണിച്ചാണ് തീരുമാനമെന്നും എന്നാല്‍ യുദ്ധമേഖലയിലും പ്രശ്‌നബാധിത പ്രദേശങ്ങളിലും സാധാരണക്കാരെ നിയമിക്കില്ലെന്നും ഉന്നത സൈനിക ഉദ്യോഗസ്ഥര്‍ വ്യക്തമാക്കി.
ഇത് നിര്‍ത്തലാക്കുന്നത് സംബന്ധിച്ച് ചര്‍ച്ചകള്‍ ഉയര്‍ന്നു വന്നപ്പോള്‍ സഹായക് സംവിധാനം തുടരണമെന്ന നിലപാടാണ് സര്‍ക്കാര്‍ സ്വീകരിച്ചത്. ഇതിനായി ചുമതലപ്പെടുത്തിയ സൈനികര്‍ പണിയെടുക്കുന്നുണ്ടെന്ന് ഉറപ്പാക്കാനും സര്‍ക്കാര്‍ നിര്‍ദേശിച്ചു.
ഏപ്രിലില്‍ നടന്ന സൈനിക ഉദ്യോഗസ്ഥരുടെ സമ്മേളനത്തില്‍ സൈനികരുടെ ആരോഗ്യം, സഹായക് സംവിധാനം എന്നിവയാണ് പ്രധാനമായും ചര്‍ച്ച ചെയ്തത്. തുടര്‍ന്ന് സാധാരണക്കാരെ നിയമിക്കുന്നത് സംബന്ധിച്ച് തീരുമാനമെടുക്കുകയും ചെയ്തു. ഉദ്യോഗസ്ഥരെ സംരക്ഷിക്കുക, ആയുധങ്ങള്‍ പരിപാലിക്കുക, ഉത്തരവാദിത്തങ്ങള്‍ നിറവേറ്റാന്‍ സഹായിക്കുക എന്നിവയാണ് സഹായകിന്റെ ഉത്തരവാദിത്തം.
ബ്രിട്ടീഷുകാരുടെ കാലത്ത് ബ്രിട്ടീഷ് ഉദ്യോഗസ്ഥര്‍ക്ക് സഹായത്തിനായി ഇന്ത്യക്കാരായ ജവാന്‍മാരെ നിയമിക്കുന്ന പതിവ് സ്വാതന്ത്ര്യത്തിന് ശേഷവും തുടര്‍ന്ന് പോരുകയായിരുന്നു.
എന്നാല്‍ സമാധാന മേഖലകളില്‍ മാത്രമായിരിക്കും സഹായികളായി സാധാരണക്കാരെ നിയമിക്കുക. യുദ്ധമേഖലകളില്‍ സൈനികരെ തന്നെ നിയമിക്കുന്ന പതിവ് തുടരും.