തിരുവനന്തപുരം: ജില്ലയിലെ മന്ത്രിമാരും എം.എല്‍.എമാരും മറ്റുജനപ്രതിനിധികളും ഒറ്റക്കെട്ടായി ഉയര്‍ത്തിയ എതിര്‍പ്പ് മുഖവിലക്കെടുത്ത് സര്‍ക്കാര്‍. കൊല്ലം കലക്ടര്‍ അബ്ദുല്‍നാസറിനെ വയനാട് കലക്ടറായി മാറ്റി നിയമിക്കുന്നതിനുള്ള മന്ത്രിസഭായോഗ തീരുമാനം മരവിപ്പിച്ചു. ആലപ്പുഴ കലക്ടര്‍ അദീല അബ്ദുല്ലയെ വയനാട് കലക്ടറായും കൊല്ലത്തേക്ക് നേരത്തേ തീരുമാനിച്ചിരുന്ന ചീഫ് സെക്രട്ടറിയുടെ സ്റ്റാഫ് ഓഫിസര്‍ എം. അഞ്ജനെ ആലപ്പുഴ കലക്ടറായും നിയമിച്ചുകൊണ്ട് പൊതുഭരണവകുപ്പ് ഉത്തരവിറക്കി.

കലക്ടര്‍ പദവിയില്‍ നാലുമാസം പൂര്‍ത്തിയാകും മുമ്പാണ് ബി. അബ്ദുല്‍നാസറിനെ വയനാട്ടിലേക്ക് മാറ്റാന്‍ കഴിഞ്ഞ ദിവസം ചേര്‍ന്ന മന്ത്രിസഭായോഗം തീരുമാനിച്ചത്. മന്ത്രിസഭായോഗത്തില്‍ തന്നെ കൊല്ലം ജില്ലയില്‍ നിന്നുള്ള മന്ത്രിമാര്‍ ഇതിനോട് വിയോജിപ്പ് പ്രകടിപ്പിച്ചുവെന്നാണ് വിവരം. മുഖ്യമന്ത്രിയുടെ ദുരിതാശ്വാസ നിധിയിലേക്ക് പണം സമാഹരിക്കാന്‍ അബ്ദുല്‍ നാസര്‍ ആസൂത്രണം ചെയ്ത 'കെ ഫോര്‍ കെ സേഫ് കൊല്ലം പദ്ധതിയും വിജയകരമായി മുന്നേറുന്നതിനിടെയിലായിരുന്നു അപ്രതീക്ഷിതമായി സ്ഥലംമാറ്റം എത്തിയത്.