മലപ്പുറം: സംസ്ഥാനത്തെ 99.72 ശതമാനം പ്ലസ്‌വണ്‍ സീറ്റുകളിലേക്കുമുള്ള അലോട്ട്‌മെന്റ് പൂര്‍ത്തിയായപ്പോള്‍ സീറ്റ് കിട്ടാതെ പുറത്തുനില്‍ക്കുന്നത് രണ്ടുലക്ഷത്തോളം വിദ്യാര്‍ഥികള്‍. കഴിഞ്ഞദിവസം പ്രസിദ്ധീകരിച്ച മുഖ്യഘട്ടത്തിലെ അവസാന അലോട്ട്‌മെന്റ് പ്രകാരമാണ് ഇത്രയുംപേര്‍ പുറത്തുനില്‍ക്കുന്നത്. മുഖ്യഘട്ടത്തില്‍ രണ്ട് അലോട്ട്‌മെന്റുകളാണ് നടന്നത്.

സംസ്ഥാനത്താകെയുള്ള 2,87,598 സീറ്റുകളിലേക്ക് വിവിധ ജില്ലകളില്‍ നിന്നായി 4,96,347 അപേക്ഷകളാണ് ലഭിച്ചത്. ഇതില്‍ രണ്ട് അലോട്ട്‌മെന്റുകളിലായി 2,86,793 പേര്‍ക്കുമാത്രമാണ് സീറ്റ് ലഭിച്ചത്. ആദ്യഅലോട്ട്‌മെന്റ് ലഭിച്ച 27,699 വിദ്യാര്‍ഥികള്‍ നിശ്ചിതസമയത്ത് പ്രവേശനം നേടിയിരുന്നില്ല.
ഈ സീറ്റുകളിലേക്കുകൂടി രണ്ടാം അലോട്ട്‌മെന്റ് നടത്തിയിട്ടും 1,81,885 വിദ്യാര്‍ഥികള്‍ സീറ്റില്ലാതെ പുറത്തുനില്‍ക്കുകയാണ്. ജനറല്‍, സംവരണ സീറ്റുകളിലായി ഇനി 805 സീറ്റുകള്‍ മാത്രമാണ് ഒഴിഞ്ഞുകിടക്കുന്നത്. രണ്ടാം അലോട്ട്‌മെന്റില്‍ 76,413 പേര്‍ക്ക് പുതുതായി പ്രവേശനം ലഭിച്ചപ്പോള്‍ 61,608 പേര്‍ക്ക് ഹയര്‍ ഓപ്ഷനിലേക്ക് മാറാന്‍ അവസരം ലഭിച്ചു. ഏറ്റവും കൂടുതല്‍ വിദ്യാര്‍ഥികള്‍ പ്ലസ്‌വണ്‍ പ്രവേശനം നേടിയ മലപ്പുറം ജില്ലയിലാണ് സീറ്റ് കിട്ടാത്തവരും കൂടുതലുള്ളത്.

80,221 വിദ്യാര്‍ഥികള്‍ അപേക്ഷ നല്‍കിയ ഇവിടെ 39,931 പേര്‍ക്കു മാത്രമാണ് അലോട്ട്‌മെന്റ് ലഭിച്ചത്. വിവിധ ജില്ലകളില്‍ പ്ലസ്‌വണ്‍ പ്രവേശനത്തിന് അപേക്ഷ നല്‍കിയവരുടെ എണ്ണം, അലോട്ട്‌മെന്റ് ലഭിച്ചവര്‍ എന്ന ക്രമത്തില്‍.

(ഒഴിവുള്ള സീറ്റുകളുടെ എണ്ണം ബ്രായ്ക്കറ്റില്‍). തിരുവനന്തപുരം: 40867, 24494 (9), കൊല്ലം: 37656, 21464 (46), പത്തനംതിട്ട: 16893, 11453 (276), ആലപ്പുഴ: 30219,18350 (61), കോട്ടയം: 26773, 16502 (9), ഇടുക്കി: 15021, 9058 (274), എറണാകുളം: 41985, 23888 (4), തൃശൂര്‍: 43371,25282 (4), പാലക്കാട്: 45584, 23655 (18), കോഴിക്കോട്: 49104, 27179 (14), മലപ്പുറം: 80221, 39931 (21), വയനാട്: 12099, 7856 (2), കണ്ണൂര്‍: 37510, 25000 (35), കാസര്‍കോട്: 19044, 12690 (32).

രണ്ടാം അലോട്ട്‌മെന്റ് ലഭിച്ച വിദ്യാര്‍ഥികള്‍ ഇന്ന് വൈകിട്ട് അഞ്ചിനകം പ്രവേശനം നേടിയില്ലെങ്കില്‍ ഇവരുടെ സീറ്റും അലോട്ട്‌മെന്റ് നടക്കാത്ത 805 സീറ്റുകളും ഉള്‍പ്പെടുത്തി സപ്ലിമെന്ററി അലോട്ട്‌മെന്റ് നടക്കും. മെറിറ്റ് അടിസ്ഥാനത്തില്‍ ഏകജാലകത്തിലൂടെ പ്രവേശനം ലഭിച്ചവര്‍ക്ക് സ്‌കൂള്‍, കോമ്പിനേഷന്‍ മാറ്റങ്ങള്‍ക്ക് അവസരമുണ്ട്. ഇതുസംബന്ധിച്ച കൂടുതല്‍ വിവരങ്ങള്‍ 29ന് പ്രസിദ്ധീകരിക്കും.

സ്‌കൂള്‍ മാറ്റത്തിനായി 30 മുതല്‍ പ്രവേശനം ലഭിച്ച സ്‌കൂളില്‍ അപേക്ഷ സമര്‍പ്പിക്കാം. ഒന്നാം ഓപ്ഷനില്‍ അലോട്ട്‌മെന്റ് ലഭിച്ചവര്‍ക്ക് മാറ്റത്തിന് അവസരമില്ല. ഇതിനുശേഷമുള്ള ഒഴിവുകള്‍ കണക്കാക്കിയാണ് ജൂലൈ ആറിന് സപ്ലിമെന്ററി അലോട്ട്‌മെന്റിനുള്ള അപേക്ഷ സ്വീകരിക്കുക. മുഖ്യഘട്ട അലോട്ട്‌മെന്റ് നടപടികള്‍ പൂര്‍ത്തിയാക്കി പ്ലസ്‌വണ്‍ ക്ലാസുകള്‍ 29ന് ആരംഭിക്കും.

രണ്ടാം അലോട്ട്‌മെന്റ് ലഭിച്ചവര്‍
ഇന്ന് പ്രവേശനം നേടണം

മലപ്പുറം: രണ്ടാം അലോട്ട്‌മെന്റില്‍ ഇടംപിടിച്ചവര്‍ ഇന്ന് വൈകിട്ട് അഞ്ചിനകം സ്ഥിരപ്രവേശനം നേടണം. വിശദാംശങ്ങള്‍ ംംം.വരെമു.സലൃമഹമ.ഴീ്.ശി എന്ന വെബ്‌സൈറ്റില്‍ ലഭ്യമാണ്. ഒന്നാം അലോട്ട്‌മെന്റില്‍ താല്‍ക്കാലിക പ്രവേശനം നേടിയ വിദ്യാര്‍ഥികള്‍ക്ക് രണ്ടാം അലോട്ട്‌മെന്റില്‍ മാറ്റമില്ലെങ്കില്‍ ഹയര്‍ ഓപ്ഷന്‍ നിലനിര്‍ത്താന്‍ അവസരമില്ല.