അങ്കാറ: കൊല്ലപ്പെട്ട ഐ.എസ് തലവന്‍ അബൂബക്കര്‍ ബഗ്ദാദിയുടെ മൂത്ത സഹോദരിയെ തുര്‍ക്കി സേന സിറിയയില്‍ നിന്നു പിടികൂടി. 65കാരിയായ റസ്മിയ അവാദിനെയാണ് ഭര്‍ത്താവിനും അഞ്ചു മക്കള്‍ക്കുമൊപ്പം പിടികൂടിയതെന്ന് തുര്‍ക്കി അധികൃതര്‍ അറിയിച്ചു. അലപ്പോയിലെ അസാസ് നഗരത്തില്‍ താമസിച്ചിരുന്ന ട്രെയിലര്‍ കണ്ടെയിനറില്‍ നിന്നാണ് ഇവരെ പിടികൂടിയത്.
തുര്‍ക്കി രഹസ്യാന്വേഷണ വിഭാഗത്തിന്റെ സുവര്‍ണനേട്ടമെന്ന് ഇതിനെ വിശേഷിപ്പിച്ച ഉദ്യോഗസ്ഥന്‍ കൂട്ടത്തിലെ മുതിര്‍ന്നവരെ ചോദ്യംചെയ്തുവരുന്നതായി അറിയിച്ചു. ഐ.എസിനെ കുറിച്ച് ബഗ്ദാദിയുടെ സഹോദരിക്ക് അറിയാവുന്ന കാര്യങ്ങള്‍ മനസ്സിലാക്കുകയാണ് ലക്ഷ്യം. അത് ഈ ഭീകരസംഘടനയെക്കുറിച്ച് കൂടുതല്‍ അറിയാനും കൂടുതല്‍ പേരെ പിടികൂടാനും സഹായിക്കും- ഉദ്യോഗസ്ഥന്‍ പറഞ്ഞു.
കഴിഞ്ഞമാസമാണ് സിറിയയിലെ ഇദ്‌ലിബില്‍ യു.എസ് സേനയുടെ സൈനികനടപടിക്കിടെ ബഗ്ദാദി സ്വയം സ്‌ഫോടകവസ്തു ഉപയോഗിച്ച് പൊട്ടിത്തെറിച്ചത്. ഐ.എസിനെതിരായ നടപടിയില്‍ തുര്‍ക്കിയുടെ പ്രതിബദ്ധതയെയാണ് ബഗ്ദാദിയുടെ സഹോദരിയെ പിടികൂടിയത് കാണിക്കുന്നതെന്ന് തുര്‍ക്കി പ്രസിഡന്റ് ഉര്‍ദുഗാന്‍ പറഞ്ഞു.