വാഷിങ്ടണ്‍: ഫേസ്ബുക്കിലെ 100 ആപ്പ് നിര്‍മാതാക്കളെങ്കിലും ഉപയോക്താക്കളുടെ വിവരങ്ങള്‍ കൈക്കലാക്കിയിട്ടുണ്ടാവുമെന്ന് പ്രമുഖ സാമൂഹ്യമാധ്യമമായ ഫേസ്ബുക്ക്. ഗ്രൂപ്പ് അംഗങ്ങളുടെ വിവരങ്ങള്‍ കഴിഞ്ഞ രണ്ടുമാസത്തിനിടെ 11 പങ്കാളികള്‍ സ്വന്തമാക്കിയതായും ഫേസ്ബുക്ക് ഉറപ്പിച്ചു പറയുന്നു.
വിഡിയോ സ്ട്രീമിങ് ആപ്പുകളുള്‍പ്പെടെ ഗ്രൂപ്പ് അംഗങ്ങളുടെ പേര്, പ്രൊഫൈല്‍ ഫോട്ടോ എന്നിവ ഗ്രൂപ്പിന്റെ എ.പി.ഐ (അപ്ലിക്കേഷന്‍ പ്രോഗ്രാമിങ് ഇന്റര്‍ഫേസ്) യില്‍ നിന്ന് നേടിയതായാണ് ഫേസ്ബുക്ക് അന്വേഷണത്തില്‍ കണ്ടെത്തിയിരിക്കുന്നത്.
ഇതോടെ ഗ്രൂപ്പ് എ.പി.ഐ പോലുള്ള ഫേസ്ബുക്കിന്റെ നിരവധി എ.പി.ഐകള്‍ നീക്കംചെയ്യുകയോ നിയന്ത്രിക്കുകയോ ചെയ്തതായും കമ്പനി അറിയിച്ചു.
അംഗങ്ങളുടെ വിവരങ്ങള്‍ നീക്കംചെയ്യാന്‍ ആപ്പുടമകളോട് ആവശ്യപ്പെടും. ഇത് ഉറപ്പാക്കാനായി ഓഡിറ്റര്‍മാരോട് ആവശ്യപ്പെടും- ഫേസ്ബുക്ക് അധികൃതര്‍ പറഞ്ഞു.
ഈ ആപ്പുകളെല്ലാം ഗ്രൂപ്പ് അഡ്മിനുമാര്‍ക്ക് എളുപ്പത്തില്‍ നിയന്ത്രിക്കാനാവുന്നവയാണ്.
ഇന്ത്യക്കാരുള്‍പ്പെടെ 8.7 കോടി ഉപയോക്താക്കളുടെ വിവരങ്ങള്‍ ബ്രിട്ടന്‍ ആസ്ഥാനമായ കാംബ്രിജ് അനലിറ്റിക്കക്ക് കൈമാറിയതിന് ഫേസ്ബുക്കിനെതിരേ കേസ് നിലനില്‍ക്കുന്നതിനിടെയാണ് പുതിയ വിവരമോഷണ റിപ്പോര്‍ട്ട് പുറത്തുവന്നിരിക്കുന്നത്.
അതുമായി ബന്ധപ്പെട്ട് യു.എസിലെ ഫെഡറല്‍ ട്രേഡ് കമ്മിഷന്‍ ഫേസ്ബുക്കിന് 500 കോടി ഡോളര്‍ പിഴ ചുമത്തിയിരുന്നു.