തിരുവനന്തപുരം: സിഗ്‌നല്‍ തകരാറിലായതിനെ തുടര്‍ന്ന് ട്രെയിനുകള്‍ വൈകി. തിരുവനന്തപുരത്തുനിന്ന് വടക്കോട്ടും തിരിച്ചുമുള്ള ട്രെയിനുകളാണ് ക്രമം തെറ്റിയോടുന്നത്.
കൊച്ചുവേളിക്ക് സമീപം ചിറയിന്‍കീഴ് ശാര്‍ക്കര ക്ഷേത്രത്തിനുസമീപം പാളത്തില്‍ വിള്ളലുണ്ടായതിനെ തുടര്‍ന്നാണ് സിഗ്‌നല്‍ പ്രവര്‍ത്തനരഹിതമായത്. തകരാര്‍ പരിഹരിച്ചെങ്കിലും ട്രെയിനുകള്‍ കൃത്യസമയത്ത് ഓടിത്തുടങ്ങിയിട്ടില്ല. ഇന്നലെ രാവിലെ ബംഗളൂരു- കൊച്ചുവേളി എക്‌സ്പ്രസ് കടന്നുപോയതിനു പിന്നാലെയാണ് ശാര്‍ക്കരയിലെ പാളത്തില്‍ വിള്ളല്‍ കണ്ടെത്തിയത്. ഇതോടെ തിരുവനന്തപുരത്തേക്ക് എത്തുന്ന പല ട്രെയിനുകളും വൈകി.
തുടര്‍ന്ന് കൊച്ചിയിലേക്ക് പോകുന്ന ട്രെയിനുകള്‍ പലതും പിടിച്ചിടേണ്ടിവന്നു. അരമണിക്കൂറിനുള്ളില്‍ വിള്ളല്‍ പരിഹരിച്ചു.
23നും കൊച്ചുവേളിയില്‍ സിഗ്‌നല്‍ തകരാറായതുമൂലം ട്രെയിനുകള്‍ വൈകിയിരുന്നു. ഇന്നലെ രാവിലെയോടെയാണ് സിഗ്‌നല്‍ പൂര്‍വ സ്ഥിതിയിലായത്. ജനശതാബ്ദി, ഏറനാട്, വേണാട് എക്‌സ്പ്രസുകള്‍ മണിക്കൂറുകളാണ് വൈകിയത്.
നാഗര്‍കോവില്‍- മംഗലാപുരം ഏറനാട് എക്‌സ്പ്രസ് അഞ്ചുമണിക്കൂറോളം വൈകി. തിരുവനന്തപുരം- കോഴിക്കോട് ജനശതാബ്ദി എക്‌സ്പ്രസ് മൂന്നു മണിക്കൂറോളം വൈകി. തിരുവനന്തപുരം- ഷൊര്‍ണൂര്‍ വേണാട് എക്‌സ്പ്രസ് രണ്ടര മണിക്കൂറും തിരുവനന്തപുരം- ഗൊരഗ്പൂര്‍ രപ്തിസാഗര്‍ എക്‌സ്പ്രസ് നാലുമണിക്കൂറും വൈകി.