ബ്യൂണസ് അയേഴ്‌സ്: കോപ്പ ലിബര്‍ട്ടഡോറസ് കപ്പിന്റെ ഫൈനല്‍ അനിശ്ചിത കാലത്തേക്ക് നീട്ടി. ഫൈനലില്‍ പങ്കെടുക്കുന്ന ടീമുകളായ റിവര്‍ പ്ലേറ്റിന്റെയും ബൊക്കാ ജൂനിയേഴ്‌സിന്റെയും ആരാധകര്‍ തമ്മിലുള്ള പോര് കളിക്കാരിലേക്കും എത്തിയതോടെയാണ് ഫൈനല്‍ അനിശ്ചിത കാലത്തേക്ക് നീട്ടിയത്.
ചിരവൈരികളായ ബൊക്ക ജൂനിയേഴ്‌സും റിവര്‍പ്ലേറ്റും തമ്മില്‍ നടക്കാനിരുന്ന രണ്ടണ്ടാംപാദ ഫൈനല്‍ മത്സരത്തിന് തൊട്ടു മുന്‍പായി ബൊക്കയുടെ താരങ്ങള്‍ ആക്രമിക്കപ്പെട്ടതിനെ തുടര്‍ന്ന് ശനിയാഴ്ച നടക്കേണ്ടിയിരുന്ന മത്സരം ഞായറാഴ്ചത്തേക്ക് മാറ്റിയിരുന്നു. ഞായറാഴ്ചയും ആരാധകര്‍ അക്രമാസക്തരായതോടെയാണ് കളി അനിശ്ചിതകാലത്തേക്ക് നീട്ടിയത്.
ഇരു ടീമുകളും തമ്മില്‍ നടന്ന ആദ്യപാദ ഫൈനല്‍ 2-2 എന്ന നിലയിലായിരുന്നു. രണ്ടണ്ടാം പാദമത്സരം നടക്കുന്നതിന് രണ്ടണ്ട് മണിക്കൂര്‍ മുന്‍പ് കളിക്കാരുമായെത്തിയ ബൊക്ക ടീമിന്റെ ബസിന് നേരെ ആരാധകര്‍ ആക്രമണമഴിച്ചുവിടുകയായിരുന്നു. ബൊക്ക ടീമിന്റെ ബസ് ആരാധകര്‍ എറിഞ്ഞു തകര്‍ത്തതിനെ തുടര്‍ന്ന് ചില കളിക്കാര്‍ക്ക് പരുക്കേല്‍ക്കുകയും ചെയ്തു.
ബൊക്കയും റിവര്‍പ്ലേറ്റും തമ്മില്‍ നടക്കാറുള്ള എല്ലാ മത്സരങ്ങളിലും കൈയാങ്കളി പതിവാണ്. മൂന്നു വര്‍ഷം മുന്‍പ് ഇരുവരും കോപ്പ ലിബര്‍ട്ടഡോറസ് പ്രീക്വാര്‍ട്ടറിനിറങ്ങിയപ്പോള്‍ ബൊക്ക ആരാധകര്‍ റിവര്‍പ്ലേറ്റിന്റെ താരങ്ങളെ കുരുമുളക് സ്‌പ്രേ ഉപയോഗിച്ച് ആക്രമിച്ചതിനെ തുടര്‍ന്ന് ബൊക്ക ജൂനിയേഴ്‌സിനെ ടൂര്‍ണമെന്റില്‍നിന്ന് പുറത്താക്കിയിരുന്നു.
യൂറോപ്പിലെ ചാംപ്യന്‍സ് ലീഗ് എന്നതുപോലെയാണ് സൗത്ത് അമേരിക്കയിലെ കോപ്പ ലിബര്‍ട്ടഡോറസ്. ഫൈനലില്‍ ബൊക്കയും റിവര്‍പ്ലേറ്റും ഇതാദ്യമായാണ് ഏറ്റുമുട്ടുന്നതെന്ന പ്രത്യേകതകൂടിയുണ്ടണ്ട്. ഏതാനും ദിവസം മുമ്പ് ഇരുടീമുകളുടെയും പരിശീലനത്തിന് സ്റ്റേഡിയം മുഴുവന്‍ കാണികളെത്തിയത് വാര്‍ത്തയായിരുന്നു.